Ամերիկյան դերասանուհի Անջելինա Ջոլին այսօր ՄԱԿ-ի Անվտանգության խորհրդին կոչ է արել առաջին հերթին ուշադրություն դարձնել սեռական բռնությանը՝ զինված հակամարտության պայմաններում: Ջոլին ելույթ է ունեցել ԱԽ նիստում, որն անցկացվել է Մեծ Բրիտանիայի ղեկավարությամբ, հաղորդում է ITAR-TASS-ը:
«Բռնաբարությունը պատերազմի գործիք է, մարդկության դեմ ագրեսիայի և հանցագործության դրսևորում: Այն կյանքեր է կործանում և հակամարտություններ բորբոքում»,- ասել է դերասանուհին: Հիշեցնենք, որ նա 2001-ից ի վեր ՄԱԿ-ի բարի կամքի դեսպան է:
«Եթե այդ հանցագործությունը տեղի է ունենում, ուրեմն դուք թույլ եք տալիս դա: Եթե Անվտանգության խորհուրդը հակամարտության մեջ բռնաբարության խնդիրն առաջնային համարի, հնարավոր է որոշակի առաջընթաց: Եթե դուք դա չանեք, սարսափները կշարունակվեն»,- Խորհրդի 15 անդամ երկրներին զգուշացրել է Ջոլին:
Նիստի արդյունքում Խորհրդի անդամները ընդունել են 2106 բանաձևը, որը պետք է ամրացնի ՄԱԿ-ի՝ պատերազմի պայմաններում սեռական բռնության դեմ պայքարի մեխանիզմը:
