Ստեփանակերտի Մամուլի ակումբի նախագահ, «Անալիտիկոն» հանդեսի գլխավոր խմբագիր Գեղամ Բաղդասարյանը բաց նամակով դիմել է ԵԱՀԿ Մինսկի խմբի համանախագահներին՝ առաջարկելով լրատվամիջոցների դեպքում ևս անցկացնել մշտադիտարկում և ներդնել ատելախոսության հետաքննության մեխանիզմներ, որի իրականացման համար նա ոչ մի բարդություն չի տեսնում:
«Կան համապատասխան լրագրողական կազմակերպություններ հակամարտության երեք կողմերում էլ՝ Հայաստանում, Ադրբեջանում և Լեռնային Ղարաբաղում, որոնք տարիներ շարունակ մշտադիտարկում են անցկացնում: Այնպես որ՝ տեխնիկական առումով որևէ խնդիր չեմ տեսնում, կա, բնականաբար, քաղաքական կամքի հարց»,- «Առաջին լրատվական»-ի հետ զրույցում ասաց պարոն Բաղդասարյանը:
Մեր զրուցակիցը թեև սպասում է, որ առարկություններ կլինեն Ադրբեջանի կողմից, սակայն միանգամայն իրատեսական է համարում գաղափարը, քանի որ նրա խոսքով՝ այդ մշտադիտարկումը կարող են իրականացնել լրագրողական անկախ կազմակերպությունները ԵԱՀԿ Մինսկի խմբի հովանու ներքո. «Ի տարբերություն շփման գծում հետաքննության մեխանիզմների ներդրման՝ այստեղ պաշտոնական համաձայնության կարիք չկա»:
Ինչպես նկատեց ԼՂ Մամուլի ակումբի նախագահը, լրատվամիջոցների մշտադիտարկմանը որևէ կողմի անհամաձայնությունը շատ դժվար է, քանզի այդ կողմը ստիպված կլինի բացատրել, թե ինչու է թշնամություն սերմանում, զբաղվում ատելախոսությամբ, ուստի նա կարևորեց, որ այս առաջարկը հավանության արժանանա միայն ԵԱՀԿ Մինսկի խմբի համանախագահների մոտ:
