Ինչպես հաղորդում է Associated Press գործակալությունը, երեկ իսլամիստական կայքերից մեկում հրապարակվել է մի քանի օր առաջ Պակիստանում սպանված Ուսամա բեն Լադենի զավակների հայտարարությունը, որում նրանք իրենց հոր սպանությունը հանցագործություն են համարել, որի համար պատասխանատվություն է կրում անձամբ ԱՄՆ նախագահ Բարաք Օբաման:
Նրանք նշել են, որ ԱՄՆ-ը խախտել է միջազգային իրավունքի նորմերը, քանի որ իրենց հայրը չի կանգնել դատարանի առջև: Բացի այդ, թաղումը ծովում նվաստացնում է իրենց և անարգանք է՝ ուղղված իրենց ընտանիքին: Ենթադրվում է, որ այս նամակը կազմվել է «թիվ մեկ ահաբեկչի» որդիներից մեկի` Օմարի կողմից:
«Մենք կարծում ենք, որ ԱՄՆ նախագահը կրում է իրավաբանական պատասխանատվություն և պարտավոր է դատարանին բացատրություններ տալ մեր անհետացած հոր ճակատագի վերաբերյալ: Այն ձևը, որով նրանք ազատվեցին այդպիսի կարևորության և կարգավիճակիի տեր մարդուց՝ նետելով նրան ծովը, ոչ միայն նվասատցնում է նրա ընտանիքին և կողմնակիցներին, այլ նաև վիրավորում է միլիոնավոր մուսուլմանների զգացմունքները»,- ասված է հայտարարության մեջ: