«Հայաստանը Լեռնային Ղարաբաղի չճանաչված Հանրապետության հետ բաց սահման ունի, որը չի վերահսկվում միջազգային հանրության կողմից, այն չի վերահսկվում նույնիսկ Հայաստանի հանրության կողմից»,- այսօր Հայաստան-ԵՄ ասոցացման պայմանագրի քննարկման շրջանակում ասել է քաղաքագետ Անդրիաս Ղուկասյանը:
Ըստ նրա՝ մինչ այսօր խոսում ենք ազատ առևտրի պայմանագրի մասին, այստեղ հստակ խնդիր կա՝ այդ գործընթացները հեռացնո՞ւմ են Հայաստանը ԼՂՀ-ից, թե՞ մոտեցնում, որովհետև այստեղ կա խնդիր. կամ Եվրամիությունը պետք է փակի աչքերն այդ իրողության վրա և պետք է ընդունի, որ ինքն այսօր ստորագրում է պայմանագիր ոչ միայն ՀՀ-ի հետ, այլ նաև ԼՂ-ի չճանաչված Հանրապետության հետ, կամ էլ պետք է ինչ-որ պայմաններ դնի, որոնք պետք է իրականացվեն և ապահովեն Եվրամիության ինչ-որ ստանդարտներ: Ըստ բանախոսի՝ սա այն խնդրահարույց հարցերից մեկն է, որը կարող է խոչընդոտ հանդիսանալ պայմանագրի ստորագրման ժամանակ:
«Բազմիցս ենք ներկա եղել, երբ աշխարհաքաղաքական հարցերը Հայաստանում, օրինակ՝ հայ-թուրքական պրոտոկոլները տապալվեցին, քանի որ ճիշտ չգնահատվեցին այն ուժերը, որոնք ազդեցություն ունեն այդ պրոցեսի վրա, և այստեղ ևս մենք ունենք լատենտ ուժեր, որոնք կարող են մասնակից դառնալ այս պրոցեսին»,- ասաց նա:
Երկրորդ թույլ կողմը, ըստ նրա, այս պայմանագիրը պետք է դիտարկենք թե ներքին, թե արտաքին կյանքի համատեքստում: «Ներքին կյանքի համատեքստում այս ծրագիրն իրականացնողը այն քաղաքական ուժն է, որն ինքնին հանդիսանում է օլիգարխիայի և կոռուպցիայի հովանավոր, այսինքն՝ Եվրոպայի հետ ինտեգրացիան պետք է իրականացվի այն քաղաքական ուժի միջոցով, որն իրականացնում այդ իրադրությունը Հայաստանում»,- հավելեց Անդրիաս Ղուկասյանը:
Հանրության համար, նրա խոսքով, անհասկանալի է այս ամենը, քանի որ հանրությունը համարում է, որ այստեղ Եվրամիությունն է խախտում իր արժեքային համակարգը, երբ նստում է այդ քաղաքական ուժի հետ բանակցության, և այստեղ առաջանում է անվստահություն, հեգնանք առհասարակ ժողովրդավարական արժեքների նկատմամբ:
Երրորդ հանգամանքը, ըստ բանախոսի, «Արևելյան գործընկերության» ծրագիրն է, որն առհասարակ հատուկ Հայաստանի համար ներկայացված ծրագիր է, այն ներառում է վեց պետություն, սակայն մեկը՝ Բելառուսն արդեն հայտարարել է այդ ծրագրից դուրս գալու մասին, քանի որ համարում է դա Ռուսաստանի դեմ է, Ադրբեջանի դիրքորոշումը պարզ չէ, Մոլդովայինը՝ նույնպես, իսկ Ուկրաինան դարձավ Մաքսային միության անդամ:
«Չտեսնել այս խնդիրները, առնվազն ռոմանտիզմ է»,- ասաց Անդրիաս Ղուկասյանը:
