Ռուսական TASS լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն այսօր հայտարարել է, որ իշխող «Արդարություն և զարգացում» կուսակցությունը (ԱԶԿ) թևակոխում է զարգացման նոր փուլ:
«ԱԶԿ-ի ներքին խորհրդակցություններից հետո ես որոշեցի մայիսի 22-ին անցկացնել արտահերթ համագումար: Ես երբեք չեմ ընկել պաշտոնի հետևից և չեմ կարծում, թե կուսակցության նախագահի թեկնածու կդառնամ այնպիսի պայմաններում, երբ չկա համաձայնություն: Ես իմ թեկնածությունը չեմ առաջադրի մայիսի 22-ի քվեարկության ժամանակ:
Սակայն ես մինչև վերջին պահը կշարունակեմ իմ քաղաքական պայքարը որպես ԱԶԿ պատգամավոր: ԱԶԿ-ի համար վրա է հասել միասնականության ժամ, և ես անձամբ որևէ բացասական զգացում չեմ տածում իմ կուսակիցների ու շրջապատի հանդեպ»,- ասել է Դավութօղլուն:
Խոսելով Թուրքիայի նախագահ Ռեջեփ Էրդողանի հետ իր հարաբերությունների մասին՝ Դավութօղլուն հայտարարել է, որ մշտապես կլինի նախագահի հետ միասին. «Ինչ էլ որ տեղի ունենա, ես մշտապես հավատարիմ կմնամ նախագահի հետ մեր հարաբերություններին: Նրա ընտանիքը իմ ընտանիքն է, մենք բազմիցս առաջ ենք գնացել ուս ուսի տված, և ես կարծում եմ, որ տեղին չեն այդ թեմայով ամեն տիպի շահարկումները»:
Հիշեցնենք, որ Դավութօղլուն Թուրքիայի 26-րդ վարչապետ է դարձել 2014 թվականի օգոստոսի 28-ին՝ 2014 թվականի օգոստոսի 27-ին տեղի ունեցած ԱԶԿ-ի համագումարում կուսակցության նախագահ ընտրվելու հաջորդ օրը:
Այդպիսով 17-ամյա ընդմիջումից հետո Թուրքիայի վարչապետի պաշտոնը ստանձնեց պրոֆեսորի կոչում ունեցող քաղաքական գործիչ: Դրանից առաջ վերջին անգամ Թուրքիայի վարչապետի պաշտոնը պրոֆեսորի կոչումով զբաղեցրել էր ներկայումս հանգուցյալ Նեջմեթին Էրբաքանը: Ընդհանրապես Թուրքիայի 26 վարչապետներից միայն 7-ն են ունեցել պրոֆեսորի կոչում:
