Պաղեստինը ոչ այնքան քաղաքական աջակցության, որքան գործնական օգնության կարիք ունի: Ինչպես հաղորդում է ITAR-TASS-ը, այս մասին հայտարարել է Պաղեստինի ԱԳ նախարար Ռիադ Ալ-Մալիքին Երուսաղեմի զարգացման ռազմավարական ծրագրի ձևավորման հարցերով դոնորական միջազգային համաժողովին ելույթ ունենալիս:
«Երուսաղեմին պետք է ֆինանսական աջակցություն»,- ասել է Ալ-Մալիքին:
Նրա խոսքերով՝ «քաղաքն այսօր բախվում է շատ սպառնալիքների՝ կապված իսրայելական ագրեսիայի հետ». քանդվում են տներ, գույքեր են բռնագրավվում, Երուսաղեմը կորցնում է իր ինքնությունը:
Ալ-Մալիքին նշել է, որ Իսրայելի կառավարությունն անօրինական կերպով արտասահմանյան ընկերություններին ներգրավում է աշխատանքի պաղեստինյան շրջափակված տարածքներում: Ալ-Մալիքին համոզված է, որ ստեղծված իրավիճակը պահանջում է միջազգային հանրության միջամտությունն այս հարցում:
«Պետք են համապատասխան բանաձևեր և հավաքական նախաձեռնություններ»,- ասել է նա և հավելել, որ միայն քաղաքական աջակցությունը բավարար չէ ռազմավարական սպառնալիքների դեմ պայքարելու համար, Երուսաղեմին աջակցություն է պետք բոլոր ոլորտներում:
Եգիպտոսի արտգործնախարար Մուհամադ Ամրը Իսլամական համաժողով կազմակերպության անդամ պետություններին կոչ է արել ֆինանսական օգնություն ցուցաբերել Պաղեստինին:
Թուրքիայի ԱԳ նախարար Ահմեդ Դավութօղլուն իր հերթին հայտարարել է, որ Պաղեստինի հարցով հաջորդ գագաթնաժողովը տեղի կունենա իր երկրում: Նա ընդգծել է, որ հանուն Երուսաղեմի պայքարը ընդհանուր է մուսուլմանական ամբողջ աշխարհի համար:
