Ռուսները վերջին տարում ավելի շատ են սկսել վախենալ ահաբեկչության և միջուկային պատերազմի վտանգից, հայտնում է Interfax-ը` հղում կատարելով «Հասարակական կարծիք» հիմնադրամի հարցումների տվյալներին:
Այն հարցին, թե համաշխարհային իրավիճակի հետ կապված ի՞նչն է իրենց մեջ անհանգստություն առաջացնում, 35%-ը նշել է միջազգային ահաբեկչությունը (մեկ տարի առաջ` 22%): Նույնքան հարցվածներ էլ վախենում են միջուկային պատերազմից` 35%-ը անցյալ տարվա 32%-ի դիմաց:
Նաև աշխարհի վտագների թվում տեղ են գտել քիմիական և ռադիոակտիվ աղտոտված ջուրը, օդը, մթերքները (32%), մոլորակում թափոնների քանակը (22%), անտառների վերացումը և զանգվածային համաճարակները (18%), էներգիա և սնունդ տվող բնական ռեսուրսների սպառումը (17%), մոլորակում կլիմայի փոփոխությունը (12%):
Ռուսաստանում քաղաքացիներին մտահոգում է գների բարձրացումը և մարդկանց աղքատացումը (44% անցյալ տարվա 39%-ի դիմաց), այլ պետությունների հարձակման վտանգը (28% անցյալ տարվա 32%-ի դիմաց), քաղաքացիական պատերազմի հնարավորությունը (25%), մասսայական գործազրկությունը և ազգամիջյան հակամարտությունները (24%):
Ռուսաստանում ահաբեկչության աճը սկսել է ավելի շատ անհանգստացնել ռուսներին` 19% (12% մեկ տարի առաջ): Տնտեսական ճգնաժամից և հանցագործության աճից վախենում է հարցվածների 19%-ը: Ռուսների 10%-ը վախենում է մասսայական սովից և նույնքանն էլ ֆաշիզմի և ծայրահեղականության տարածումից:
