Այս տարվա աշնանը Գյումրու քաղաքապետի ընտրություններում պատրաստվում է առաջադրվել նաև գործող քաղաքապետ Սամվել Բալասանյանը։ Թե ինչպես և որ կուսակցության հետ է այս անգամ Սամվել Բալասանյանը մասնակցելու ընտրարշավին՝ հայտնի չէ: Գյումրու քաղաքապետի այս ընտրություններին կարող են մասնակցել միայն կուսակցությունների թեկնածուները՝ համամասնական ցուցակով:
Ուշագրավն այն է, որ Սամվել Բալասանյանի հիմնադրամը նախորդ ընտրությունների ժամանակ ընտրական տարում մոտ 3 անգամ ավելի շատ գումար է ծախսել, քան ոչ ընտրական տարիներին: Օրինակ՝ 2012 թվականի ընտրությունների ժամանակ «Բալասանյանների ընտանիք» բարեգործական հիմնադրամը, որը ստեղծվել է Գյումրու ընտրություններից ընդամենը մեկ տարի առաջ, ծախսել է 31 մլն 909 հազար 472 դրամ, իսկ արդեն 2015 թվականին՝ ընդամենը 11 մլն 850 հազար դրամ: Ըստ այդմ՝ «Բալասանյան» հիմնադրամը 2012-ին 10 միլիոն դրամի հակակարկտային կայաններ է տեղադրել և շինարարություն իրականացրել Շիրակի մարզի համայնքներում:
Գյումրու քաղաքապետի ընտրությունների ժամանակ ահազանգ եղավ, որ Բալասանյանի շտաբը ալեհավաքներ է բաժանում, սակայն շտաբից տեղեկացրին, որ իրենք տեղյակ չեն այդ մասին: Եվ ահա «Բալասանյան» բարեգործական հիմնադրամի հաշվետվության մեջ գրված է, որ հիմնադրամը ընտրական տարում 11.5 մլն դրամի արբանյակային ալեհավաքներ է անվճար տեղադրել Շիրակի մարզի որոշ համայնքների ազգաբնակչության բնակարաններում:
Բացի այդ՝ բարեգործական հիմնադրամը Շիրակի մարզի որոշ համայնքների ազգաբնակչությանը գարու անվճար սերմացու է տրամադրել՝ 5 մլն դրամ ընդհանուր արժեքով, թերևս հետևելով «Գագիկ Ծառուկյան» բարեգործական հիմնադրամի օրինակին: Սամվել Բալասանյանը նաև Շիրակի մարզի որոշ համայնքների ազգաբնակչությանը ընտրական տարում անվճար ալյուր է տրամադրել՝ ընդհանուր չորս միլիոն ութսուն հազար դրամի չափով:
Ընտրական տարում «Բալասանյանների ընտանիք» բարեգործական հիմնադրամը նաև գովազդային պաստառներ է տպագրել ու սպասարկել՝ 779 հազար 472 դրամի չափով:
Բարեգործական հիմնադրամը ընտրական տարում 300 հազար դրամ է փոխանցել «Համազգային վստահություն» հանրային խորհրդին որպես աջակցություն, և 2013-ին «համաժողովրդական քվեարկության արդյունքում հանրային ծառայության ոլորտում Գյումրու քաղաքապետ Սամվել Բալասանյանը ճանաչվել է լավագույնը և արժանացել «Տարվա լավագույն քաղաքապետ» անվանակարգին: «Բալասանյանների ընտանիք» բարեգործական հիմնադրամը աջակցել է նաև «Հայ հրաշամանուկ» ծրագրին՝ 200 հազար դրամի չափով:
Ըստ այդմ՝ 2012-ին «Բալասանյանների ընտանիք» հիմնադրամը ծախսել է 31 մլն 909 հազար 472 դրամ: Ուշագրավն այն է, որ այս ծրագրերը հաջորդ տարիներին չեն կրկնվել: 2015 թվականին «Բալասանյանների ընտանիք» հիմնադրամի ծախսերը շատ ավելի համեստ են եղել՝ գրեթե երեք անգամ:
Անցյալ տարի «Բալասանյան» հիմնադրամի ամենամեծ ներդրումը ուղղվել է արդեն ոչ թե Գյումրիին, այլ «Հայաստան» հիմնադրամին՝ 9 մլն 380 հազար դրամ: Հիմնադրամը 300 հազար դրամ ներդրում է կատարել Գյումրի քաղաքի կինոկենտրոնի ստեղծման համար: 400 հազար դրամ էլ տրամադրել է Գյումրի քաղաքի տեղեկատվական կենտրոնի ստեղծման համար: Քաղաքում սոցիալական ծրագրերի իրականացման համար հիմնադրամը տրամադրել է 1.5 մլն դրամ՝ ընդհանուր առմամբ ծախսելով 11 մլն 580 հազար դրամ:
Ստացվում է՝ բարեգործական հիմնադրամներն օգտագործում են որպես նախընտրական ընտրակաշառք բաժանելու գործիք՝ ակնհայտ շեղվելով բարեգործությունից և անհավասար պայմաններ ստեղծելով մրցակիցների միջև:
