Ռուսական TASS լրատվական գործակալության փոխանցմամբ՝ ԱՄՆ նախագահ Բարաք Օբաման կարծում է, որ Թուրքիայի նախագահ Ռեջեփ Էրդողանը խնդրահարույց դաշնակից է։
Էրդողանի կոնկրետ գործողություններն անարդյունավետ են դարձնում Վաշինգտոնի այդ վերաբերմունքը փոխելու բոլոր փորձերը։ Այս մասին The Wall Street Journal-ում հրապարակված հոդվածում գրել է թուրքական ընդդիմադիր «Ժողովրդա-հանրապետական» կուսակցության պատգամավոր Այքան Էրդեմիրը։
Նա հիշեցրել է, որ Էրդողանը երեքշաբթի մեկնել է ԱՄՆ՝ մասնակցելու միջուկային անվտանգության հարցերով գագաթնաժողովին, մարտի 31-ին պաշտոնապես նրան ընդունելու է ԱՄՆ փոխնախագահ Ջոզեֆ Բայդենը, բայց ոչ՝ նախագահ Բարաք Օբաման։
Պատգամավորն ընդգծել է, որ Էրդողանի համար, որի պահվածքը Օբամայի վարչակազմին հարկադրել է նրան դիտարկել որպես խնդրահարույց գործընկեր առանցքային տարածաշրջանում, վրա է հասել կրիտիկական կարևոր պահ։
Պատգամավորը հենց Էրդողանի պահվածքով է բացատրում այն, որ Օբաման չի երաշխավորել նրա հետ երկկողմ հանդիպում և չի մասնակցելու Մերիլենդ նահանգում մզկիթի ու իսլամական կենտրոնի բացմանը, որոնց կառուցումը ֆինանսավորել է Անկարան։
Էրդեմիրը նկատել է, որ թուրքական մամուլում իշխում են հակաամերիկյան տրամադրություններ, և սա առաջին դեպքը չէ, որ Էրդողանը փորձում է ամրապնդել Արևմուտքի հետ հարաբերությունները և միաժամանակ հայրենիքում խթանում է այլատյացության քարոզչություն։
Էրդեմիրի խոսքով՝ փախստականների շուրջ ԵՄ-ի ու Թուրքիայի միջև ձեռք բերված գործարքը ոչ միայն ամրապնդել է Թուրքիայի նախագահի վստահությունը, այլև անպատժելիության զգացումը, իսկ ահա Ատլանտյան օվկիանոսից այն կողմ Էրդողանի բախտն այդքան էլ չի բերում։
