17 երկրաշարժի ցնցում 1 օրում: Էպիկենտրոնը՝ Գավառ քաղաքից 16 կմ դեպի հարավ-արևմուտք, օջախի խորությունը՝ 10 կմ, ուժգնությունը՝ 0.5-1.4 մագնիտուտ, ստորգետնյա ցնցման ուժգնությունը էպիկենտրոնում՝ 1-2 բալ: Արտակարգ իրավիճակների նախարարության տեղեկատվությունն է: Ցնցումներն սկսվել են ժամը 11:03-ից և ավարտվել 13:24-ին:
Սեյսմիկ պաշտպանության ծառայության պետ Հրաչյա Պետրոսյանն է: 17 ցնցման առաջացրած իրարանցումի պատճառով այսօր անդադար հեռախոսազանգերի է պատասխանել: Բոլորին հորդորել է խուճապի չմատնվել, վտանգավոր ոչինչ չկա:
Իրար հետևից գրանցված ցնցումները մասնագետը արտառոց չհամարեց: Այդ տարածքում երկրակեղևի անհանգստություն պարբերաբար է լինում, թեև 17-ը չգերազանցված թիվ է:
Հրաչյա Պետրոսյանը բացատրեց. պատմական անցյալում այդ տարածքում ուժեղ երկրաշարժ չի գրանցվել, այդ պատճառով ծառայությունն աշխատում է օպերատիվ, հետևում զարգացումներին հետագա սցենարը պատկերացնելու համար:
Գավառի տարածաշրջանում գրանցված երկրաշարժի 17 ցնցումը եղանակի ակտիվության ետ կապ չունի: Թույլ հարվածները արձանագրել են միայն սարքերը, բնակչության շրջանում ոչինչ չի գրանցվել:
Մասնագետը մեկ անգամ ևս հորդորում է խուճապի չմատնվել, ձեռքը պահում են վտանգի զարկերակին: Անհանգստանալու առիթի դեպքում կզգուշացնեն:
