Վատիկանում ֆինանսների համար պատասխանատու ավստրալացի կարդինալ Ջորջ Փելը ցուցմունք է տվել կաթոլիկ հոգևոր սպասավորների կողմից անչափահասների նկատմամբ սեքսուալ բռնությունների գործով: Այս մասին հաղորդում է BBC-ն:
Երեխաների նկատմամբ սեքսուալ բռնության դեպքերի հետաքննությունը անցկացվում է Ավստրալիայի հատուկ հանձնաժողովի կողմից: Անձամբ կարդինալին սեքսուալ բռնության մեջ չեն մեղադրում: Հանձնաժողովին հետաքրքրում է մեկ այլ հոգևոր սպասավոր, որի հետ Փելը 1970-ականների սկզբին աշխատել է ավստրալական Բալարաթ քաղաքում:
Կարդինալին թույլ են տվել ցուցմունք տալ տեսակապով, քանի որ նրա առողջական վիճակը նրան թույլ չի տվել Վատիկանից մեկնել Ավստրալիա: Հավանաբար ցուցմունք տալը կտևի 3 օր: Հանձնաժողովի ներկայացուցիչների հետ առաջին զրույցում Փելն ասել է, որ չի պաշտպանի նրանց, ովքեր դրան արժանի չեն, և խոստովանել է կաթոլիկ եկեղեցու սխալները:
Հետաքննությունը կապված է քահանա Ջերալդ Ռիսդեյլի հասցեին մեղադրանքների հետ: Նա 1993-2013-ին պատիժ է կրել անչափահասների դեմ հանցագործությունների համար: Հետաքննության վարկածով՝ Բալարաթում աշխատող Ռիսդեյլը 1960-80-ականների ընթացքում մասնակցել է 130 տղաների նկատմամբ սեքսուալ բռնությանը:
