Բելառուսի համար ընդունելի չէ ներքին աղբյուրների միջոցով արտաքին սպառնալիքների իրագործման սցենարը։ Այս մասին հայտարարել է Բելառուսի նախագահ Ալեքսանդր Լուկաշենկոն բարձրագույն սպայական կազմին ուսադիրներ հանձնելու արարողության ժամանակ՝ փոխանցում է TASS գործակալությունը։
«Վերջին տարիների բոլոր ռազմական հակամարտությունները ցուցադրում են մեկ առանձնահատկություն։ Խոսքը ներքին աղբյուրների միջոցով արտաքին սպառնալիքների իրագործման մասին է, որը, որպես կանոն, ավարտվում է իշխանության փոփոխմամբ ու պետության կործանմամբ»,- ասել է Լուկաշենկոն։ Նրա խոսքով՝ «նման սցենարը մեզ համար անընդունելի է, թեև այն Բելառուսին պարտադրելու փորձեր եղել են»,- ասել է նա։
«Բռնի մեթոդների համակարգային կիրառումը ոչ ռազմական ոլորտներում (հատկապես՝ ֆինանսական, տնտեսական, տեղեկատվական) փոխել է ժամանակակից պատերազմի էությունը»,- ասել է նախագահը՝ նշելով, որ այսօր դրանում կիրառվում են բոլոր միջոցները միաժամանակ՝ և՛ ռազմական, և՛ ոչ ռազմական։
Նա նշել է, որ նոր դարը չբերեց ազատություն պատերազմներից։ Լուկաշենկոյի կարծիքով՝ նման պայմաններում անվտանգությունն ու կայունությունը բելառուսցիների համար բարձրագույն արժեքներ են։ Նա նշել է, որ երկրի նոր ռազմական դոկտրինայի հիմնական դրույթները վերանայվել են՝ համապատասխան առկա մարտահրավերների ու անվտանգության պոտենցիալ սպառնալիքների։
