Թուրքական Takvim թերթի փոխանցմամբ՝ Թուրքիայի ու Սաուդյան Արաբիայի ռազմաօդային ուժերը համատեղ զորավարժություն են անցկացրել Քոնիայի նահանգում։
Դրանց ընթացքում Թուրքիայի ռազմաօդային ուժերի F-16 տիպի կործանիչի օդաչուն թռիչքի ժամանակ սելֆի է արել սաուդյան F-15 մարտական ինքնաթիռների օդաչուների հետ, ինչը լայն արձագանք է գտել համացանցում։
Այն Twitter-ի իր միկրոբլոգում տեղադրել է ռազմական վերլուծաբան Մեթին Գյուրջանը` ընդգծելով, որ հետին պլանում պատկերված են սաուդյան F-15 մարտական ինքնաթիռները։
Ավելի վաղ Թուրքիայի ու Սաուդյան Արաբիայի միջև պայմանավորվածություն է ձեռք բերվել այն մասին, որ Սաուդյան Արաբիան ԴԱԻՇ-ի դեմ պայքարի շրջանակներում մարտական ինքնաթիռներ կուղարկի «Ինջիրլիքի» ավիաբազա։
Պաշտոնական տվյալներով՝ դրանք դեռ «Ինջիրլիքում» չեն, ուր ներկա դրությամբ գտնվում են ԱՄՆ-ի, Մեծ Բրիտանիայի, Գերմանիայի, Ֆրանսիայի ինքնաթիռները, ինչպես նաև Կատարին պատկանող «Միրաժ» տիպի երկու մարտական ինքնաթիռ։
Հաղորդվել էր, որ նախորդ շաբաթվանից Թուրքիայում գտնվում են սաուդյան 5 կործանիչ, սակայն դրանք ոչ թե «Ինջիրլիքում» են, այլ՝ Քոնիայում։ Նաև հաղորդվել էր, որ այդ ինքնաթիռները վերադառնալու են Սաուդյան Արաբիա և հաջորդ շաբաթ «Ինջիրլիք» է ուղարկվելու F-15 տիպի 4 ինքնաթիռ։
