«Ես կարծում եմ, որ սա կլինի լայնամասշտաբ խորհրդակցություն, որտեղ կընդգրկվեն ոչ միայն տնտեսական հարցեր, քանզի դրանք չեն կարող լինել քաղաքական խնդիրներից անկախ, չեն կարող լինել այսօրվա կարևորագույն աշխարհաքաղաքական պրոբլեմներից զատ. սա պետք է նայել ընդհանրության մեջ»,- «Առաջին լրատվական»-ի հետ զրույցում ասաց Արտակարգ և լիազոր դեսպան Արման Նավասարդյանը՝ անդրադառնալով ՀՀ նախագահ Սերժ Սարգսյանի՝ խորհրդակցությունների շարք անցկացնելու նախաձեռնությանը, որի մեկնարկը եղավ իրանական ուղղությունը:
«Իրանի հետ հարաբերությունները պետք է զարգացնել եռակողմ ձևաչափով՝ մասնակից դարձնելով նաև Ռուսաստանին: Գաղտնիք չէ, որ Ռուսաստանը այդ հարաբերությունների զարգացումը թույլ չի տալիս, ուստի պետք է նրան շահագրգռել, որպեսզի թույլ տա»:
Արման Նավասարդյանի խոսքով՝ շատ կարևոր է, որ իրանական կողմը, որը Ռուսաստանի հետ ստորագրել է ազատ առևտրի գոտու վերաբերյալ պայմանագիր, պնդում է, որ Հայաստանը պետք է գտնվի այդ առևտրային կապերի կիզակետում, և դա հուշում է նաև Հայաստանի աշխարհագրական դիրքը. «Իրանը մեզ համար պետք է լինի կոմունիկացիոն ճանապարհ և գործիք, որը պետք է լուծի ոչ միայն տնտեսական, այլև անվտանգության խնդիր»:
Մեր զրուցակիցը վստահ է, որ այսօրվա իրականությունը նաև շանս է Հայաստանի համար. «Այս երկու ուժերի՝ ԵՏՄ-ԵՄ միջև խաղը պետք է լինի մեր հիմնական ուղենիշը՝ որպես փոքր պետություն»:
Այնուամենայնիվ, Արմանը Նավասարդյանը չի կարծում, որ այս ամենը պետք է ֆետիշացնել և համարել, թե ամեն ինչ շատ հեշտ ու հանգիստ կլինի. «Ես չափավոր լավատես եմ, որովհետև Իրանի ընտրությունն այժմ մեծ է: Հայաստանը պետք է կարողանա հմուտ կերպով մանևրել, որովհետև մեր երկրի նկատմամբ այսօր էլ բարեհաճ են Եվրոպան և ԱՄՆ-ը, ընդ որում՝ բոլոր ոլորտներում»:
Հարցին՝ որքանո՞վ է մեր դիվանագիտական դպրոցը համահունչ այսօրվա հարափոփոխ գործընթացներին, Արմանն Նավասարդյանն ասաց. «Այսօրվա դիվանագիտությունը և արտաքին քաղաքականությունը բոլորովին այն չեն, ինչ 20, 10 տարի առաջ: Այսօր ամեն ինչ փոխվում է, որովհետև փոխվել է նաև աշխարհաքաղաքական իրավիճակը: Եթե դիվանագիտությունն այսօր չունենա լայն ժողովրդական ընդգրկում տվյալ պետության ներսում, նաև՝ պետությունից դուրս, չի կարող հաջողություն ունենալ: Հաջորդ կարևոր գործոնը հաշվետվությունն է՝ հարկատուին հետաքրքրում է ոչ թե այն, թե ինչպես ես անում, այլ այն, թե ինչ ես անում»:
Արտակարգ և լիազոր դեսպանի համոզմամբ՝ մենք պետք է հրաժարվենք դիլետանտ դիվանագետների քաղաքական նշանակումից:
