Փետրվարի 18-ի երեկոյան առանց մեքենավարի և ուղևորների գնացք է անցել Բելգիայի Լանդեն և Տիրլեմոն քաղաքների կայարանների միջև: Այս մասին հայտնում է DH.be-ն՝ հղում անելով SNCB-ի (Բելգիայի երկաթուղիներ) տեղեկությանը:
Ինչպես հայտնի է դարձել՝ դատարկ ուղևորատար գնացքն ուղևորվել է Լուվեն քաղաք, երբ մեքենավարը անսարքություն է նկատել: Նա կանգնեցրել է գնացքն ու իջել խցիկից՝ տեսնելու, թե ինչ է եղել: Այդ պահին գնացքն անհայտ պատճառով սկսել է արագություն հավաքել: Մեքենավարը չի հասցրել հետ նստել գնացք:
Երկաթուղայինը նախազգուշացրել է իր գործընկերներին, որոնք ձեռնարկել են անհրաժեշտ ամեն ինչ անկառավարելի գնացքը կանգնեցնելու համար:
Գնացքը դանդաղ է ընթացել, ճանապարհն ազատ է եղել: Տիրլեմոն քաղաքի կայարանում գտնվող մարդիկ տարհանվել են: Նրանց կյանքին ոչինչ չի սպառնացել, հայտնել է SNBC ընկերության մամլո քարտուղար Բարթ Քրոլսը:
Ավելի ուշ մեքենավարներից մեկը կարողացել է ցատկել խցիկ ու կանգնեցնել գնացքը: Բելգիայի երկաթուղիների ղեկավարարությունն ու փորձագետները պարզում են պատճառները, որոնք կատարվածի պատճառ են դարձել:
