Թուրքիայի վարչապետ Ռեջեփ Թայիփ Էրդողանը հայտարարել է, որ հունիսին կայցելի Գազայի հատված: Այս մասին փոխանցում է RIA Novosti-ն:
Ապրիլի վերջին Ստամբուլ կատարած այցի ժամանակ ԱՄՆ պետքարտուղար Ջոն Քերին հայտարարել էր, որ Էրդողանը պետք է սպասի իր այցի իրականացման առավել համապատասխան պայմանների: Քերիի այդ հայտարարությունը հարուցել էր թուրքական իշխանությունների քննադատությունը. նրանք հայտարարել էին, որ Էրդողանը, որպես ինքնիշխան պետության վարչապետ, ինքն է որոշում իր արտասահմանյան ուղևորությունների ժամկետը:
«Ամենայն հավանականությամբ, ես Գազա կգնամ հունիսին: Ես շատ մեծ նշանակություն եմ տալիս Մերձավոր Արևելքի խաղաղ գործընթացի շրջանակում իմ այդ այցին: Կարծում եմ, որ իմ այցը ներդրում կունենա Պաղեստինի հետ հաշտեցման գործընթացում»,- հայտարարել է Էրդողանը Վաշինգտոնում ԱՄՆ նախագահ Բարաք Օբամայի հետ համատեղ մամլո ասուլիսի ժամանակ:
Էրդողանը նշել է, որ ծրագրում է նաև Հորդանան գետի Արևմտյան ափ այցելել: «Անշուշտ, խոսքը մեկ կողմի աջակցության մասին չէ»,- պարզաբանել է նա:
Թուրքիայի վարչապետը ԱՄՆ էր այցելել 15-րդ անգամ:
Իսրայելը, որի հարաբերությունները Թուրքիայի հետ սկսել են կարգավորվել, ավելի վաղ խոստացել է չխոչընդոտել թուրք վարչապետի այցին Գազա:
