Ռուսական RIA Novosti լրատվական գործակալության փոխանցմամբ՝ Ղրիմի իշխանությունները Թուրքիային կոչ են արել չշահարկել Ղրիմի կարգավիճակն ու չփորձել կասկածի տակ դնել Ռուսաստանի հետ թերակղզու վերամիավորումը։ Այդ մասին հայտնել է Ղրիմի կառավարության փոխվարչապետ Ռուսլան Բալբեկը.
«Մենք Թուրքիային կոչ ենք անում չշահարկել Ղրիմի կարգավիճակը՝ ձեռքը մտցնելով ուրիշի գրպան։ Թուրքական իշխանությունները երկու տարի նախընտրել են Ղրիմը չանվանել Ուկրաինայի մաս՝ հովանավորելով իր ներդրողների աշխատանքը ղրիմյան տարածաշրջանում»։
Բալբեկը մանրամասնել է, որ մինչև ռուս-թուրքական հարաբերությունների սրացումը թուրք տասնյակ գործարարներ ժամանել են ռուսական Ղրիմ՝ մտադիր լինելով իրենց միջոցները ներդնել զբոսաշրջային, ենթակառուցվածքների, գյուղատնտեսության ոլորտներում.
«Ռուսական շրջանի տնտեսությունում ենթադրյալ ներդրումների ծավալը կազմել են միլիարդավոր դոլարներ։ Ոչ մի թուրք ներդրողի չէր խանգարել Ղրիմի ռուսական կարգավիճակը»։
Սրանից առաջ հաղորդվել էր, որ Թուրքիայի վարչապետ Ահմեդ Դավութօղլուն Կիևում հայտարարել է, թե Թուրքիան Ղրիմն ընկալում է որպես Ուկրաինայի անքակտելի մաս։
