«Կարծում եմ՝ հանրությանը չի հետաքրքրում, թե Դաշնակցությունը երբ կմտնի կոալիցիա, ով կդառնա նախարար և մարզպետ: Հիմնական գործարքը այսօր չի կայացել, այլ հանրաքվեից շատ ժամանակ առաջ, երբ Դաշնակցությունը ստանձնել էր սահմանադրական նախագծի կնքահոր կարգավիճակը»,- «Առաջին լրատվական»-ի հետ զրույցում ՀՀԿ-ՀՅԴ համագործակցության վերաբերյալ իր կարծիքը հայտնեց քաղաքագետ Արմեն Աղայանը:
Նրա կարծիքով՝ ՀՀԿ-ն այս գործարքից ոչ թե հիմա է շահ ակնկալում, այլ Սահմանադրության հանրաքվեի ժամանակ, որպեսզի այդ ամենը ներկայացվեր ոչ թե որպես անձնական իշխանությունը երկարաձգելու օպերացիա, այլ որպես ինչ-որ քաղաքական գործընթաց:
«Իսկ պաշտոնների բաժանումը ներհանրապետական խնդիր է»,- ասաց Արմեն Աղայանը՝ հավելելով, որ իշխող համակարգը շատ ծայրահեղ ճգնաժամային վիճակում է. «Հանրապետականում կան թևեր, որոնք Սերժ Սարգսյանի ժառանգության համար պիտի հիմա մրցակցեն: Սերժ Սարգսյանն ամեն ինչ անում է, որպեսզի մի որոշակի ժառանգ չլինի, որովհետև երբ ժառանգը լինի, ինքն այլևս իշխանություն չի ունենա»:
Հարցին՝ ընդդիմադիր ո՞ր ուժը կարող է հակակշիռ լինել կոալիցիոն ուժին, Արմեն Աղայանն ասաց. «Արձանագրենք, որ հին ընդդիմությունը մահացավ: Ըստ էության Կոնգրեսը գոյություն չունի այն իմաստով, ինչ իմաստով գոյություն ուներ Լևոն Տեր-Պետրոսյանի ընտրարշավից հետո»: Նրա կարծիքով՝ Հրանտ Բագրատյանի՝ ընդդիմության կոալիցիա կազմելու առաջարկը ևս անիմաստ է. «Այսօր ընդդիմությունը կարող է միմիայն ազգայնական բնույթ կրել: Հակառակ դեպքում մենք կունենանք շատ տաղտկալի ընտրություններ և խորհրդարան»:
