ԱՄՆ սենատը հավանություն է տվել օրինագծին, համաձայն որի՝ Վաշինգտոնում Չինաստանի դեսպանատան դիմաց գտնվող հրապարակը կանվանակոչվի ի պատիվ այլախոհ և իրավապաշտպան Լյու Սյաոբոյի: Այս մասին հայտնում է Reuters-ը:
Օրենքի նախագիծը մտցրել է ԱՄՆ նախագահի պաշտոնին հավակնող հանրապետական սենատոր Թեդ Քրուզը:
Չինաստանի դեսպանատան ներկայացուցիչ Չզու Հայկուանը հայտարարել է, որ այդ քայլը «սադրիչ է և անարդյունավետ»: «Մենք ամերիկյան կողմից համառորեն պահանջում ենք դադարեցնել այդ գործողությունները»,- ասել է նա:
Սպիտակ տան ներկայացուցիչի խոսքով՝ ԱՄՆ-ը, ինչպես նախկինում, անհրաժեշտ է համարում ազդել Չինաստանի վրա, որպեսզի նա հետևի մարդու իրավունքներին և ազատ արձակի Լյու Սյաոբոյին:
2008 թվականին Լյու Սյաոբոյին դատապարտել են 11 տարվա ազատազրկման այն բանի համար, որ նա եղել է «Խարտիա-08»-ի հեղինակներից մեկը, որը կոչ է անում ժողովրդավարացնել Չինաստանի քաղաքական համակարգը: 2010 թվականին այլախոհ Լյու Սյաոբոն դարձել է Նոբելյան մրցանակի դափնեկիր «Չինաստանում մարդու հիմնարար իրավունքների պաշտպանության երկարատև պայքարի» համար:
