Sputnik լրատվական գործակալության փոխանցմամբ՝ Վրաստանում 2016 թվականին կաճի Իրանից եկող զբոսաշրջիկների թիվը, ինչը դրականորեն կանդրադառնա երկրի տնտեսության վրա։ Այդ մասին հայտարարել է Զբոսաշրջության ազգային վարչության ղեկավար Գեորգի Չոգովաձեն։
Ավելի վաղ հաղորդվել էր, որ Վրաստանն Իրանի հետ վիզային ռեժիմը չեղյալ է հայտարարելու փետրվարի 15-ից։ Այն միակողմանի սահմանվել էր 2013 թվականին, ինչը Վրաստանի իշխանություններն այն ժամանակ պարզաբանել էին ՄԱԿ-ի խորհուրդներով։
Չոգովաձեն հայտարարել է, որ վիզային ռեժիմի վերացումը դրականորեն կազդի ոչ միայն զբոսաշրջային, այլև այն առումով, որ Իրանը շահագրգռված է ներդրումային նախագծերի իրականացմամբ. «Դուք կտեսնեք, որ ոչ վիզային ռեժիմի դեպքում կաճի զբոսաշրջիկների թիվը, կվերականգնվի ավիահաղորդակցությունը, և կաճեն ներդրումները Վրաստանում»։
Փետրվարի 15-ին Իրանից Վրաստան է ժամանելու լրագրողների ու տուրօպերատորների խումբ, որոնք կծանոթանան Վրաստանի զբոսաշրջային պոտենցիալի հետ։ Չոգովաձեն հայտարարել է, որ Իրանը՝ որպես երկիր ու որպես շուկա, դառնում է ավելի բաց աշխարհի համար, և այդ առումով իրենց կողմից վիզային ռեժիմի վերացումը բացարձակապես ժամանակին ու համարժեք է։
Փետրվարի 12-ին Վրաց-իրանական առևտրային պալատը ( Georgia-Iran Chamber of Commerce and Industry, GICCI) Tbilisi Marriott հյուրանոցում անցկացնելու է «Վրաստանի ու Իրանի միջև հարաբերությունների զարգացման հեռանկարները» թեմայով համաժողով, որին կմասնակցեն Վրաստանում Իրանի դեսպան Աբբաս Թալեբ Ֆարին, ինչպես նաև Իրանում ու Վրաստանում գործող բիզնես-ընկերությունները։
