«Շտապե՛ք, 70% զեղչ, վերջին տաք-տաք պերաշկիները, թորգոմ&նորիկ էլեկտրոնիկայի խանութ. գնեք մեկ հեռուստացույց, 100-ն ստացեք անվճար». մեկ օրվա ընթացքում մոտավորապես այս բովանդակությամբ առնվազն 8 sms կարող է սևեռել ձեր ուշադրությունը հեռախոսի վրա: Եթե բախտներդ չբերի, ու այդ պահին նոր ստացած աշխատավարձը դեռ գրպանում լինի՝ գովազդային sms-ի գայթակղությանը դիմանալու ձեր շանսերն ավելի քիչ են: 70% զեղչի ախորժակը, սակայն, արագ կփակվի՝ հենց հասնեք դեպքի վայր:
ԱԺ պատգամավոր Էդմոն Մարուքյանը զեղչի մասին հաղորդագրությունն ստացել է VEGA էլեկտրոնիկայի վաճառատնից, գնացել խանութ՝ էժանացած տեխնիկա գնելու, բայց արդյունքում խաբված լինելու մասին գրություն է ուղարկել ՏՄՊՊՀ-ին:
Պարզվում է՝ պատգամավորի դռանը չոքած ուղտը շատերին է այցելել: Քաղաքացիները զեղչային միֆերին այլևս լուրջ չեն վերաբերվում:
Կեղծ զեղչերի մասին հաղորդագրությունը ոտնահարում է սպառողի իրավունքը ու դաշտը չկարգավորող օրենքի պատճառով դեռևս մնում անպատիժ: Սպառողների խորհրդատվության կենտրոնի ղեկավար Կարեն Չիլինգարյանը մատնացույց է անում ՏՄՊՊՀ-ի անտարբերությունը: Թույլ վերահսկողության հերթական պտուղները քաղում են շարքային սպառողները:
Մասնագետի խոսքով՝ սպառողները խաբված են նույնիսկ այն դեպքում, եթե 70 տոկոս զեղչը համապատասխաներ իրականությանը: Այդ պարագայում ապրանքը ոչ թե զեղչվում է, այլ վաճառվում է առնվազն ինքնարժեքով:
Եթե ապրանքը զեղչված է, ուրեմն որակը զիջում է: Որքան էժան է տեխնիկան, այնքան կարճատև է դրա կյանքը: Արհեստանոցում այդ պատճառով փչացած հեռուստացույցների պակաս չի զգացվում:
Արհեստավորի խոսքով՝ այստեղ հայտնված տեխնիկայի մեծ մասն ունեն գործարանային խնդիր կամ վնասվել են տեղից տեղ տեխափոխելու ճանապարհին: Սակայն փաստն այն է, որ օգտագործողի բնակարանում այս հեռուստացույցները քիչ են ապրել, որովհետև սրահը նորոգում է երաշխիքային ժամկետում գտնվող հեռուստացույցները:
