Հայոց համազգային շարժումը կվերագրանցվի: Այսօր լրագրողների հետ հանդիպմանը այս մասին հայտարարեցին շարժման նախկին ակտիվ անդամներ Արարատ Զուրաբյանը, Կարապետ Ռուբինյանը, Հովհաննես Իգիթյանը, Ալեքսանդր Արզումանյանը. վերջինս մայիսի 2-ին դուրս է եկել «Ազատ դեմոկրատներ»-ից:
«Նախաձեռնել ենք չորսով, բայց ակնհայտ է, որ բազմաթիվ ընկերներ մեզ հետ են և կմիանան այս հայտարարությանը: Շատ համախոհներ ունենք: Հայտնի է, որ մի ստվար հատված կմիանա այս նախաձեռնությանը: Նախաձեռնող խմբի կազմում են արդեն մոտ 200 մարդ, և միացողներ էլի կլինեն»,- նշեց Ալեքսանդր Արզումանյանը: Բանախոսը հավելեց, որ մայիսի 2-ին դիմում է ներկայացրել «Ազատ դեմոկրատներ»-ից դուրս գալու մասին:
Հարցին՝ ի՞նչ հարաբերություններ ունի Խաչատուր Քոքոբելյանի հետ, նա կմիանա՞ իրենց, թե՞ ոչ, Ա. Արզումանյանը պատասխանեց. «Վերջին անգամ երեկ եմ տեսել Խ. Քոքոբելյանին և ասեմ, որ յուրաքանչյուր քաղաքացի կարող է միանալ, եթե ընդունում է Հայոց Համազգային շարժման կանոնադրությունը»:
Ասուլիսի մյուս բանախոսը՝ Արարատ Զուրաբյանը, ի պատասխան այն հարցին, թե՝ ո՞վ է ֆինանսավորելու ՀՀՇ-ին, ասաց. «Կուսակցության ֆինանսավորումը լինելու է շատ բաց և թափանցիկ, անդամավճարի ձևով: Հայաստանի քաղաքական համակարգում կուսակցությունների մի մասին ֆինանսավորում է իշխանությունը, մի մասին՝ այլ կառույց, մենք գտել ենք այդ գործընթացը ինչ-որ ձևով բաժանելու ճանապարհը՝ ֆինանսավորումը հավասարապես բաժանելու անդամների միջև»,- ասաց նա՝ հավելելով, որ մինչև աշուն կկայանա ՀՀՇ համագումարը:
Հարցին՝ կուսակցությունը լինելու է ընդդիմադի՞ր, թե՞, հնարավոր է, այլընտրանքային, Ա. Արզումանյանը պատասխանեց. «Հաշվի առնելով այստեղ նստածների կենսագրությունը՝ չեմ կարծում, թե հարցը կոռեկտ է. ՀՀՇ-ն պետք է չէ համեմատել այս կամ այն կառույցի, կուսակցության հետ: ՀՀՇ-ի վերաստեղծման հիմնական նպատակը բռնապետական ռեժիմի դեմ պայքարն է, շարունակելու ենք պայքարը սահմանադրական կարգի վերականգնման համար. մեր գնահատականները միշտ բարձրաձայնվել են: Այդ պատճառով հաճախ հայտնվել ենք նեղ պայմաններում, բայց երբևէ մեր մոտեցումներում չենք սխալվել»:
Լրագրողները հետաքրքրվեցին, թե կհամագործակցե՞ն արդյոք այլ քաղաքական ուժերի հետ. «Ակնհայտ է, որ բոլոր ազատական գաղափարներ կրող կուսակցությունների հետ ունենք ջերմ հարաբերություններ՝ «Ազատություն», «Հանրապետություն»: Ցանկացած խնդիրների շուրջ կարող ենք լսել տեսակետներ, բայց պարզ է, որ դա չի կարող լինել մեր գաղափարախոսության հաշվին»,-ասաց Արզումանյանը:
Իր հերթին Հովհաննես Իգիթյանը հավելեց. «Համագործակցությունն ու գործարքը տարբեր բաներ են, և Հայաստանում շատ հաճախ այդ երկու երևույթները նույնականացվում են: Մենք պատրաստ ենք համագործակցել, բայց ոչ երբեք գործարքի գնալ»:
