Հոլիվուդյան դերասաններ Բրյուս Ուիլիսը և Դեմի Մուրը բաժանումից 16 տարի անց պատրաստվում են միանալ, բայց՝ էկրանին: Նախկին ամուսինները մտադիր են գլխավոր դերեր խաղալ Հոլիվուդի նոր մասշտաբային նախագծում, որի մանրամասները դեռ գաղտնի են պահվում: Այս մասին հայտնում է TASS-ը՝ հղում անելով ամերիկյան ԶԼՄ-ներին:
Լրագրողների տեղեկությամբ՝ ներկայումս Ուիլիսը և Մուրը ծանոթանում են իրենց առաջարկված ֆիլմի սցենարին, որի հիմքում սիրող հավատարիմ ամուսինների հարաբերություններ են:
Վերջերս 53-ամյա Մուրը հազվադեպ է նկարահանվում՝ ժամանակի մեծ մասը նվիրելով իր երեխաներին: 60-ամյա Ուիլիսը նկարահանման հրապարակներում ավելի հաճախ է լինում: Մասնավորապես, նա վերջերս համաձայնվել է մասնակցել «Պինդ ընկույզ» ֆիլմի նկարահանումներին: Այդ շարքի առաջին ֆիլմը (1988) նրան համաշխարհային հռչակ է բերել:
Դեմին և Բրյուսը վերջին անգամ միմյանց հետ աշխատել են «Մահացու մտքեր» ֆիլմում, որն էկրան է բարձրացել 1991թ., երբ նրանք դեռ օրինակելի ամուսնական զույգ էին: Դերասաններն ամուսնացել են 1987թ., ամուսնացած են եղել 13 տարի: Այդ ընթացքում 3 աղջիկ են ունեցել:
2000թ. ամուսինները ամուսնալուծվել են՝ պահպանելով ընկերական հարաբերություններ, ինչից 5 տարի անց Դեմին ամուսնացել է դերասան Էշթոն Քաթչերի հետ: 2013թ. նրանք բաժանվել են: Ուիլիսը ևս կյանքի նոր ընկերուհի է գտել՝ բրիտանացի 37-ամյա դերասանուհի և ֆոտոմոդել Էմմա Հեմինգը, որից նա ունեցել է ևս 2 աղջիկ:
