ԱՄՆ-ում աճուրդի է դրվել ինքնաթիռը, որը ավելի քան երեք տասնամյակ տեղափոխել է նախագահների ու այլ բարձրաստիճան պաշտոնյաների: Այս մասին հայտնել է ԱՄՆ կառավարությանը կից Ընդհանուր նշանակության ծառայության վարչությունը (GSA)՝ փոխանցում է RIA Novosti-ն:
Գերատեսչության կայքում հաղորդվում է, որ լոտի մեկնարկային գինը 50 հազար դոլար է:
Նշվում է, որ այդ օդանավով երթևեկել են նախագահներ Ֆորդը, Քարթերը, Ռեյգանը, Բուշը, Քլինթոնն ու Բուշը, ինչպես նաև փոխնախագահներ, առաջին տիկնայք, գեներալներ, ծովակալներ, արտասահմանյան պաշտոնական անձինք և այլք:
Վաճառվող մոդելը երկշարժիչանի McDonnell Douglas DC-9-ն է, որը ԱՄՆ կառավարությունում «ծառայել է» 1975-2005 թվականներին: Օդանավը ներկայում գտնվում է Արիզոնա նահանգի Ֆինիքս քաղաքում: Գնորդն այն պետք է տանի անձամբ:
Աճուրդը ծրագրված է անցկացնել մայիսի 15-ին: Նախկին նախագահական ինքնաթիռից բացի՝ աճուրդի կդրվեն նավեր, ավտոմեքենաներ, տիեզերանավերի մասեր, ծանր շինարարական մեքենաներ և գիտական սարքավորումներ, որոնք այլևս պետք չեն ԱՄՆ կառավարությանը:
