«Մեծ յոթնյակի»(G7) երկրները՝ ԱՄՆ-ը, Գերմանիան, Ֆրանսիան, Մեծ Բրիտանիան, Իտալիան, Կանադան և Ճապոնիան, հաստատել են իրենց մտադրությունը՝ հանուն ազգային տնտեսության աճի արժույթների փոխարժեքների վրա չազդելու վերաբերյալ: Ինչպես հայտնում է Agence France-Presse-ը, այս մասին հայտարարել է Մեծ Բրիտանիայի ֆինանսների նախարար Ջորջ Օսբորնը՝ Լոնդոնի Էյլսբերի արվարձանում G7-ի կենտրոնական բանկերի ղեկավարների ու ֆինանսների նախարարների երկօրյա հանդիպման արդյունքներով:
Բացի այդ, երկրները պայմանավորվել են հարկերից խուսափելու դեմ պայքարում կոլեկտիվ գործողությւոնների ներմուծման շուրջ:
Էյլսբերիում բանակցություններն անցկացվել են «Մեծ ութնյակի»(այդ կազմում ներառված է նաև Ռուսաստանը՝ ի թիվս վերոնշյալ երկրների) գագաթաժողովից մեկ ամիս առաջ:
G7-ի երկրները կրկնել են հավաստիացումները՝ շուկայական մեխանիզմների հանդեպ հակվածության վերաբերյալ՝ ճապոնական արժույթի փոխարժեքի նոր իջեցման ֆոնին:Մայիսի 9-ին ամերիկյան դոլարը 2008 թվականից ի վեր առաջին անգամ բարձրացել է 100 իենից:
Վերջին ամիսներին Ճապոնիան շարունակում է թուլացնել ազգային արժույթը՝ արտահանման պահանջարկի մեծացման համար: Ճապոնիայի իշխանությունների կողմից իրականացվող ագրեսիվ դրամավարկային քաղաքականությունն արդեն արժութային պատերազմների մեկնարկի մասին կասկածների առաջացման հիմք է դարձել։
