«Մեզ համար քաղաքակրթության ընտրության խնդիրն աշուշտ, շատ կարևոր է, բայց մենք պետք է կարողանանք պատմական փորձից ելնելով՝ ընտրություն չկատարել սևի և սպիտակի միջև, այլ փորձել կրկին հանդիսանալ այն խաչմերուկը, այն քաղաքակրթական մայրուղին, որի միջոցով տարբեր քաղաքակրթական հոսքերը կարող են առնչվել միմյանց հետ: Այս տեսանկյունից Իրանի հետ մեր հարաբերությունները, ընդհանուր առմամբ, չափազանց հետաքրքիր են»: Այս մասին «Առաջին լրատվական»-ի հետ զրույցում ասաց ԵՊՀ իրանագիտության ամբիոնի վարիչ, իրանագետ Վարդան Ոսկանյանը:
Իրանագետի դիտարկմամբ՝ դավանական, կրոնական տարբերությունները իրանցիների համար այս հարթության մեջ ռելեվանտ չեն, և Հայաստանի ու Իրանի հարաբերությունները օրինակելի են որպես մի կողմից մահմեդական, մյուս կողմից ավանդական քրիստոնեական երկրների հարաբերություններ:
«Իրանցիների ընկալումը մեր հանդեպ խիստ դրական է, և մենք պետք է օգտվենք այդ հանգամանքից,- նշեց Վարդան Ոսկանյանը,- Իրանում կա հայամետ քաղաքական վերնախավ և այդ վերնախավի հետ աշխատելու մեխանիզմներ կան: ԶԼՄ-ների մակարդակով խոսակցություններ կան, որ հավանաբար այս տարի Իրանի նախագահ Ռուհանին այց կկատարի Հայաստան»:
Վ. Ոսկանյանի հավաստմամբ՝ իրանցիները չեն շտապում բանակցությունների ընթացքում և չեն գնում արկածախնդրության: Նրա խոսքով՝ չի կարելի ակնկալել, որ Իրանը իր հարաբերությունները կդադարեցնի Ադրբեջանի հետ կամ Թուրքիայի հետ, ռեալիստական դիտարկմամբ՝ պահպանելու է այս երկրների հետ հարաբերությունները: Բայց կա մի կարևոր հանգամանք. Իրանի վճռորոշ դեր ունեցող վերնախավի շատ ներկայացուցիչներ չունեն ադրբեջանամետ դիրքորոշում: Բացի դրանից՝ Իրանը Ադրբեջանից մշտապես ակնկալում է վտանգ:
«Մենք պետք է ունենանք երազանք, ապագայի տեսլական»,- նշեց իրանագետը և հավելեց, որ վտանգներին զուգահեռ պետք է կարողանանք հաշվարկել մեր հնարավորությունները:
Մանրամասները՝ տեսանյութում:
