«Ես վստահ չեմ, որ մինչև 2017թ. որևէ քաղաքական գործընթաց չի լինի Հայաստանում, այնպիսի գործընթաց, որը կցնցի այս երկիրը»,- այսօր լրագրողների հետ հանդիպմանը նման տեսակետ հայտնեց ՀԱԿ կուսակցության փոխնախագահ Լևոն Զուրաբյանը՝ ի պատասխան այն հարցի, թե ՀԱԿ-ը ի՞նչ է անելու մինչև մյուս ընտրությունները:
«Մենք հստակ ցույց կտանք, թե ինչ վիճակում է հայտնվել ժողովուրդը, մենք կոչ ենք անելու, որ մարդիկ փրկությունը չտեսնեն արտագաղթի մեջ, և պետք է հույս տանք, որ մնան մեր երկրում: Բացի այդ, հզորանալու են կառույցները, տեղի կունենան էֆեկտիվ ագիտացիա, ցույցեր, հանրահավաքներ, դեմոկրատական ակցիաների ամբողջ զինանոցի օգտագործում, որոնք կկարողանան բեկում մտցնել և ժողովրդին ազատագրել այս ավազակապետությունից»,- ասաց նա:
Խոսելով ՀԱԿ-ի սխալների մասին՝ Զուրաբյանն ասաց. «Այո՛, Կոնգրեսը հայտնվել էր ճգնաժամի մեջ, մարդիկ, որոնք չորս տարի մեզ հետ էին, չդիմացան ճնշումներին, չեմ բացառում, որ որոշ մարդիկ չհասկացան, թե ինչ սկզբունքով է շարժումը գնում: Այդ առումով Կոնգրեսը հայտնվեց ճգնաժամի մեջ, այսինքն՝ ավելի շատ վեճ կար, քան գործ, դա էլ իր հերթին մեծ դեր կատարեց, որ ՀԱԿ-ը չմասնակցեց նախագահական ընտրություններին, սակայն դրա լուծումը գտնվեց կուսակցություն ստեղծելու մեջ»:
ՀԱԿ փոխնախագահը հավելեց, որ մայիսի 5-ին ամենալուրջ համագործակցություն է եղել Դաշնակցության, Կոնգրեսի և ԲՀԿ-ի միջև. «Այնպես չէ, որ Կոնգրեսի ներկայացուցիչները փայլում էին, որոշ տեղամասերում իրենց շատ վատ են պահել: Կոնգրեսի ներկայացուցիչները համագործակցել են հանրապետականների հետ: Կոնգրեսը, Դաշնակցությունը և ԲՀԿ-ն վճռական կռիվ են տվել տեղամասերում, իսկ «Ժառանգությունը» ձախողել է»:
Այն հարցին, թե՝ ինչպե՞ս է գնահատում ՀԱԿ-ը ԲՀԿ-ի աշխատանքը դրսում՝ տեղամասերից դուրս, Լևոն Զուրաբյանը պատասխանեց. «Ահազանգեր ենք ստացել, որ ԲՀԿ-ն էլ է ուղղորդում, բնականաբար՝ դա մեզ համար անընդունելի է, եթե եղել են նման դեպքեր: Բայց ընտրություններից մեկ օր առաջ ինձ է այցելել է Երևանի փոխոստիկանապետ Վալերի Օսիպյանը և ոստիկանապետի անունից վստահեցրել, որ ոստիկանությունը ցանկանում է անցկացնել բացառիկ օրինական ընտրություններ, ինչը մենք չտեսանք ընտրությունների օրը: Եվ այս առումով թողնել այն ամենը, ինչ ակնհայտ էր ընտրությունների օրը և ուրիշ բան խոսել, կարծում եմ՝ կնշանակի շեղել պարզապես հասարակության ուշադրությունը»:
Լուսանկարը՝ PanARMENIAN Photo-ի
