Թուրքական Hürriyet թերթի փոխանցմամբ՝ Թուրքիայի Ազգային հետախուզական կազմակերպությունը (MIT) Ստամբուլի կենտրոնում երեկ գրանցված ահաբեկչությունից առաջ երկու անգամ՝ դեկտեմբերի 17-ին և հունվարի 4-ին, ոստիկանության ու անվտանգության ծառայության բոլոր ստորաբաժանումներին զգուշացրել է Ստամբուլում ու Անկարայում պատրաստվող ահաբեկչական հարձակումների մասին, որոնց թիրախում լինելու են օտար դիվանագիտական առաքելություններն ու օտարազգի զբոսաշրջիկները։ Այս մասին թերթին հայտնել է իրավապահ մարմիններում նրա աղբյուրը։
Հունվարի 12-ին Ստամբուլում հնչած պայթյունի հետևանքով զոհվել է 10 մարդ, որոնք բոլորն էլ օտարազգիներ են։ Թուրքիայի իշխանություններն այն որակել են որպես ահաբեկչություն։
Թուրքական հետախուզության տվյալներով՝ ահաբեկչական հարձակումների թիրախում կարող են լինել այն երկրների քաղաքացիները, որոնց երկրները միջազգային կոալիցիայի կազմում մասնակցում են ԴԱԻՇ-ի դեմ պայքարին։
МIT-ը նաև զգուշացրել էր, որ կարող են հարձակման ենթարկվել Գերմանիայի, Ֆրանսիայի ու Նիդերլանդների դիվանագիտական առաքելությունները, և ներկայացրել էր 13 պոտենցիալ մահապարտ-ահաբեկիչների անուններ։
