Լեհաստանը «ճակատային» պետություն է և այդ պատճառով էլ ՆԱՏՕ-ի բազաների տեղակայման կարիք ունի: Այս մասին հայտնել է երկրի պաշտպանության նախարար Անտոնի Մացարևիչը՝ գրում է Lenta.ru-ն:
«Լեհաստանը ճակատային պետություն է, որին սպառնում է ամենաբարձր աստիճանի հարձակում: Հենց մեզ վրա կարող է ջարդվել ագրեսորի «հեղեղը»: Այդ պատճառով էլ մենք պետք է որոշելու հնարավորություն ունենանք, թե պաշտպանության ինչպիսի միջոցներ կիրառենք: Խոսքը նաև մեր դաշնակիցների զորքերի տեղակայման մասին է, որոնք կաջակցեն մեր անվտանգությանը, եթե մեր երկիրը դա անհրաժեշտ համարի»,- ասել է Մացարևիչը:
Նախարարի կարծիքով՝ հուլիսի 8-9-ը Վարշավայում կայանալիք ՆԱՏՕ-ի գագաթնաժողովում կորոշվի՝ արդյոք Լեհաստանը դաշինքի «լիիրավ» անդա՞մ է, թե՞ նրան դիտարկում են որպես «երկրորդ կատեգորիայի պետություն»: Մացարևիչը նշել է, որ դեռևս Լեհաստանի նկատմամբ գործում է Գերմանիայի վետոն, և հույս է հայտնել, որ մոտ ժամանակներս իրավիճակը կփոխվի:
