Ռեժիսոր Թոմ Մաքքարթիի «Ուշադրության կենտրոնում», Սթիվեն Սփիլբերգի «Լրտեսական կամուրջ», Ալեխանդրո Գոնսալես Ինյարիտուի «Ողջ մնացածը», Ռիդլի Սքոթի «Մարսեցին» ֆիլմերն ընդգրկվել են 10 ֆիլմերի ցուցակում, որոնք առաջադրվել են Ամերիկայի պրոդյուսերների գիլդիայի մրցանակներին տարվա «Լավագույն ֆիլմ» անվանակարգում: Այս մասին հայտնում է TASS-ը:
Թեկնածուների ցուցակը հրապարակել է գիլդիան, որը միավորում է կինոյում և հեռուստատեսությունում աշխատող ավելի քան 4000 պրոդյուսերների:
Պրոդյուսերների ընտրությունը կանգ է առել նաև «Խելագար Մաքսը. Կատաղության ճանապարհ», «Իջեցման խաղ», «Բրուքլին» ֆիլմերի վրա:
Անվանի պրոդյուսերները մրցանակի արժանի են համարել N.W.A հիփ-հոփ խմբի վերելքի և անկման մասին «Փողոցների ձայնը» ֆիլմը: Թեկնածուների տասնյակը եզրափակում է Դենի Վիլնյովի «Մարդասպանը» ֆիլմը, նաև բրիտանացի կինեմատոգրաֆիստների «Մեքենայից» գիտաֆանտաստիկ աշխատանքը:
«Լավագույն անիմացիոն ֆիլմ» կարող են դառնալ «Անոմալիզան», «Լավ դինոզավրը», «Գլուխկոտրուկը», The Peanuts Movie-ն, «Մինիոնները»: Պրոդյուսերական մրցանակների հաղթողների անունները կհայտարարվեն հունվարի 23-ին:
