Ամերիկացիների մեծ մասը դեմ է, որպեսզի ԱՄՆ-ը միջամտի Սիրիայի քաղաքացիական պատերազմին: Ինչպես հաղորդում է RBK-ն, այս մասին վկայում են Reuters/Ipsos-ի կողմից անցկացված հարցման արդյունքները:
Հարցումն անցկացվել է համացանցի միջոցով՝ 18 տարին լրացած 519 ամերիկացիների շրջանում:
Հարցման համաձայն՝ ամերիկացիների 61 %-ը դեմ է հանդես եկել ԱՄՆ-ի ներխուժմանը, 10 %-ը՝ կողմ: Սակայն եթե պաշտոնական Դամասկոսը քիմիական զենք կիրառի, ռազմական միջամտության կողմնակիցների թիվը կհասնի 27 %-ի, միևնույն ժամանակ ամերիկացիների 44 %-ը նույնիսկ այս դեպքում չի աջակցի ԱՄՆ-ի ներխուժմանը:
Սոցիոլոգիական հետազոտությունը պարզել է, որ ամերիկացիների մի մասը չի հետևում Սիրիայում ընթացող իրադարձություններին կամ ոչինչ չգիտի դրանց մասին: Հարցման մասնակիցների 36 %-ը խոստովանել է, որ ոչինչ չգիտի Սիրիայի քաղաքացիական պատերազմի մասին: Սիրիայի իրադարձություններին ակտիվորեն հետևում է ամերիկացիների 8 %-ը, իսկ հարցման մասնակիցների 19 %-ը նշել է, որ «բավականաչափ ուշադրություն է դարձնում այդ դեպքերին»:
