Օրերս «Առաջին լրատվական»-ն անդրադարձել էր Ազգային ժողովի նախագահ Հովիկ Աբրահամյանի որդու՝ Արգամ Աբրահամյանին պատկանող «Իմպերիում պլազա» բիզնես-կենտրոնի՝ այս օրերին վարձակալներ փնտրելուն, ինչպես նաև նույն Աբրահամյանների ընտանիքին պատկանող National հյուրանոցին, որի համար ԱԺ նախագահը իր հետ մտերիմ պաշտոնյաների միջոցով փորձում է հաճախորդներ ապահովել հյուրանոցի համար:
«Առաջին լրատվական»-ը գրել էր, որ այժմ նրանք փորձում են վարձակալներ գտնել նաև այդ հսկայական բիզնես-կենտրոնի համար. Ի դեպ, Ամիրյան փողոցին նայող հատվածում մոտ 60 քմ ունեցող տարածքի 1 քմ-ն արժե 10.000 դրամ, այսինքն` այդքան տարածք զբաղեցնող գրասենյակի համար վարձակալը յուրաքանչյուր ամիս պետք է վճարի 600.000 դրամ կամ 1500 դոլար: Նույն հատվածում VIP տարածքի 1 քմ-ն արժե 11.000 դրամ, իսկ Տերյան փողոցին նայող գրասենյակների 1 քմ-ն 9.000 դրամ է:
«Իմպերիում Պլազայից» էլ հաստատել էին, որ բիզնես-կենտրոնը պատկանում է Աբրահամյաններին:
Հրապարակումից հետո ՀՀ ԱԺ Հասարակայնության և տեղեկատվության միջոցների հետ կապերի վարչությունից հաղորդագրություն էին ուղարկել առ այն, որ հոդվածում նշված փաստերը, մեղմ ասած, չեն համապատասխանում իրականությանը, քանի որ Ազգային ժողովի նախագահ Հովիկ Աբրահամյանը չի զբաղվում բիզնեսով, և հրապարակման մեջ նշված տարածքներն ու կազմակերպությունները կապ չունեն նրա հետ:
Մեր հրապարակումից հետո slaq.am կայքը անդրադարձել է National հյուրանոցի ձեռքբերման պատմությանը, ըստ որի 2009թ. ՀՀԿ-ական պատգամավոր Մելիք Գասպարյանի մահից հետո շենքի շինարարությունը մի պահ կանգ էր առել: Կիսակառույցի աշխատանքներն ավարտին հասցնելու գործը հորից հետո իրականացնում էր պատգամավորի որդին, ով հայտնի է «Ապեր» մականունով, սակայն որոշ շրջանակներ պատգամավորի ունեցվածքի հետ կապված պլաններ ունեին:
Այստեղ է, որ օգնության եկավ Ազգային Ժողովի նախագահ Հովիկ Աբրահամյանը: Աբրահամյանի որդին ձեռք բերեց շենքի սեփականության 33%-ը: Եվ քանի որ Մելիք Գասպարյանի որդին ավելի շատ զբաղվում էր Դուբայի իր բիզնեսով, Ամիրյան փողոցի վրա գտնվող շենքի աշխատանքները ղեկավարում էր Հովիկ Աբրահամյանի որդին: Հովիկ Աբրահամյանի` որդու հայտնվելը այս բիզնեսում ստիպեց շենքի վրա աչք դրած շրջանակներին հետ կանգնել իրենց ծրագրերից: Ըստ հրապարակման հեղինակի, այս քայլով Հովիկ Աբրահամյանը թույլ չի տվել, որ իր գործընկերոջ ընտանիքը այդ շրջանակների զոհը դառնա:
Ի դեպ Հովիկ Աբրահամյանի որդին շինարարական աշխատանքներն իրականացրել է բանկերից վարկ վերցնելով: Լրատվամիջոցի տեղեկություններով` վարկի գումարը եղել է մոտ 5 մլն ԱՄՆ դոլար, որը վերցվել է «Հայբիզնեսբանկ»-ից:
