Հայ ազգային կոնգրես կուսակցության փոխնախագահ Լևոն Զուրաբյանը այսօր լրագրողների հետ հանդիպմանը վեր հանեց գործող քաղաքապետ Տարոն Մարգարյանի եկամուտները, որոնք հայտարարագրվել էին 2005, 2007 և 2013 թվականներին ընտրություններից առաջ, և նշեց, որ Հայ ազգային կոնգրես կուսակցությունը գրավոր հաղորդում է ուղարկել գլխավոր դատախազ Աղվան Հովսեփյանին՝ առ այն, որ Տարոն Մարգարյանը տարիների ընթացքում հարստություն է դիզել հանցավոր ճանապարհով:
«Պարզվում է՝ 2005 թվականին Տարոն Մարգարյանը՝ որպես Ավանի վարչական շրջանի ղեկավար, վերջին մեկ տարվա եկամուտը ներկայացրել է 7 միլիոն 392.841 դրամ. բավականին համեստ եկամուտ, որը կարծես տրամաբանական է: 2007 թվականի խորհրդարանական ընտրություններից առաջ հայտարարագրել է շուրջ 64 միլիոն դրամ և 50 հազար դոլար, բացի դրանից՝ 80 միլիոնի եկամուտ է ունեցել ոսկյա և թանկարժեք իրերի իրացումից: Այսինքն՝ թաղապետ աշխատելու տարիներին Մարգարյանի ունեցվածքը միլիոններով աճել է:
Իր հայտարարագրերում նաև չի ասվում, թե ժառանգության կարգով գույք է ստացել, նվիրատվության կարգով ստացված գույք էլ չունի, ավելին՝ ոչ մի կողմնակի եկամուտ չունի: 2013 թվականին Տարոն Մարգարյանը արդեն հայտարարագրել է ունեցվածքը՝ 6 միլիոն դոլար, բայց մեր գնահատականներով՝ դա 10 միլիոն դոլարն անցնում է»,- նշեց Լևոն Զուրաբյանը:
Նրա խոսքով՝ այդ ունեցվածքը ստացված է ոչ միայն հանցավոր ճանապարհով, այլ նաև թաքցվել է այդ գույքը ձեռք բերելու աղբյուրը. «Ուստի 190 հոդվածին հղում անելով՝ ասում ենք, որ սա հանցագործություն է, հանցավոր ճանապարհով ստացված գույքի աղբյուրը թաքցվել է: Մենք, բնականաբար, Հայ ազգային կոնգրես կուսակցությունում կատարելով այս ուսումնասիրությունը, ես՝ որպես կուսակցության փոխնախագահ, Սամվել Աբրահամյանը՝ որպես կուսակցության քարտուղար, գրավոր հաղորդել ենք դատախազությանը՝ պահանջելով քրեական պատասխանատվության ենթարկել Տարոն Մարգարյանին»:
Թեպետ Լևոն Զուրաբյանը նշեց, որ դատախազությունից առանձնապես հույսեր չունի, քանի որ նրանք կազմում են իշխող վարչախմբի մի մասը, այդուհանդերձ՝ սա բավարար ապացույց է Տարոն Մարգարյանին քրեական պատասխանատվության ենթարկելու համար:
Լուսանկարը՝ PanARMENIAN Photo-ի
