Իտալիայի արդարադատության նախարար Աննա Մարիա Կանչելիերին, ով նախկին կառավարությունում զբաղեցրել է ՆԳՆ ղեկավարի պաշտոնը, չի կարծում, որ Լուիջի Պրեիտիին, ով այսօր Հռոմի կառավարական Կիջի պալատի մոտ կրակ է բացել կարաբիներների վրա, աջակցում են այլ ուժեր:
«Դա տագնապալի փաստ է, բայց ես չեմ հավատում, որ նրան ուղղորդել են»,- հայտարարել է նա:
Նախարարն ընդգծել է, որ անհրաժեշտ է համակողմանիորեն քննել հանցագործության բոլոր հանգամանքները: Նրա ենթադրությամբ` խոսքն «առանձին արարքի մասին է, որը կատարել է հոգեպես անհավասարակշռված մարդը»:
Նման կարծիք է հայտնել նաև Հռոմի քաղաքապետ Ջանի Ալեմանոն:
Հիշեցնենք, որ կիրակի օրը Կիջի պալատի մոտ կրակոցներ են հնչել, երբ այնտեղ տեղի էր ունենում Իտալիայի նոր կառավարության երդմնակալության արարողությունը՝ Էնրիկե Լետայի գլխավորությամբ. ներկա էր նաև երկրի նախագահը:
Լուիջի Պրեիտին առնվազն վեց անգամ կրակել է կարաբիներների ուղղությամբ, այնուհետև փորձել է փախչել, սակայն հաջողվել է նրան ձերբակալել: Հարձակման հետևանքով վիրավորվել են երկու կարաբիներներ, որոնցից մեկի վիճակը ծանր է: Թեթև վնասվածք է ստացել նաև դեպքի պահին հրապարակում գտնվող մի հղի կին:
