Ադրբեջանական Trend լրատվական գործակալությանը տված հարցազրույցի ժամանակ ԵԱՀԿ Մինսկի խմբի ամերիկացի համանախագահ Ջեյմս Ուորլիքը հայտարարել է, որ ԵԱՀԿ Մինսկի խումբը հույսեր է կապում 2016 թվականին ԵԱՀԿ-ում նախագահող Գերմանիայի հետ համագործակցության ամուռով:
«Գերմանիան համանախագահներին վստահեցրել է հակամարտության կարգավորման բանակցային գործընթացին լիակատար աջակցության մասին։ Դեկտեմբերի 3-4-ին Բելգրադում անցկացված ԵԱՀԿ արտգործնախարարների խորհրդի նիստի շրջանակներում տեղի ունեցավ Հայաստանի ու Ադրբեջանի արտգործնախարարներ Էդվարդ Նալբանդյանի ու Էլմար Մամեդյարովի հանդիպումը, որի ժամանակ քննարկվեցին երկու երկրների նախագահների մոտալուտ հանդիպման վերջնական մանրամասները։
Մենք հավատում ենք, որ ավելի քան մեկամյա ընդմիջումից հետո եկել է ժամանակը՝ նախագահների հանդիպման ու կարգավորման հետագա քայլերի կառուցողական քննարկման համար»,- ասել է Ուորլիքը։
Նրան հարց են ուղղել հակամարտության կարգավորման մասին Ռուսաստանի ներկայացրած նոր առաջարկների մասին, որոնց մասին իր ռուս գործընկերոջ տարածաշրջանային այցից հետո բարձրաձայնել է Ադրբեջանի արտգործնախարար Էլմար Մամեդյարովը, ամերիկացի համանախագահն ի պատասխան՝ ընդգծել է, որ հակամարտող կողմերն այսօր դիտարկում են մի շարք առաջարկներ, որոնք վայելում են համանախագահների ամբողջական աջակցությունը. «Ռուսաստանի արտգործնախարարը աշխատանքային զգալի փորձ ունի՝ որպես հակամարտության միջնորդ, և մենք ողջունում ենք նրա մասնակցությունն ու համանախագահների հետ աշխատանքին հավատարմությունը։
Մեր ընդհանուր նպատակն այն է, որ գտնեն տարածաշրջանի բոլոր մարդկանց շահերին համապատասխանող հակամարտության կարգավորում։ ԱՄՆ-ը նախկինի նման հավատարիմ է հակամարտության կարգավորմանն օգնելուն»։
