Նորք Մարաշի զինված հանցախմբի զինաթափումից մեկ շաբաթ անց մասնագետները, փաստաբանները ուշագրավ դիտարկումներ են կատարում դեպքի վերաբերյալ։ Ոմանց արժանահավատ է թվում ԱԱԾ-ի կողմից իրականացված վնասազերծումը, ոմանք մինչ օրս էլ հակված են կատարվածի բեմադրված լինելու վարկածին։ Փաստաբան Նիկոլայ Բաղդասարյանն ամեն ինչից զատ առանձնացնում է անմեղության կանխավարկածի խախտման հարցը։
Փաստաբանը պնդում է՝ մինչ գործի փաստական բոլոր հանգամանքները չքննվեն, հնարավոր չի լինի ասել՝ դա հանցախումբ է եղել, ահաբեկչություն է պլանավորվել, թե բոլորովին այլ բան։
Բաղդասարյանը պնդում է, որ զինված խմբի վնասազերծումից հետո նախաքննական մարմինը պետք է պահպաներ տարածքը, քանի որ հետագայում հնարավոր է լրացուցիչ զննության անհրաժեշտություն առաջանար։
Քրեական գործերով մեկ այլ փաստաբան՝ Տիգրան Աթանեսյանը, հակված է հավատալու պաշտոնական վարկածին, ասում է՝ չհավատալու հիմքեր չունի։ Իրավապահ մարմինների կողմից էլ առանձնապես բացթողումներ չի տեսնում։ Իր համար առավելապես ոչ պրոֆեսիոնալ է խմբի գործունեությունը։
Աթանեսյանի խոսքով՝ մի տանը, որտեղ 20-ից ավելի իրար հետ կապ չունեցող անձինք էին ապրում, չէին կարող չհայտնվել իրավապահ մարմինների ուշադրության կենտրոնում։
Զինված խմբի կողմից իրավապահ մարմիններին դիմադրություն ցույց չտալու հանգամանքն էլ կասկած չի հարուցում Աթանեսյանի մոտ։
Նիկոլայ Բաղդասարյանի համար մինչդեռ տարօրինակ է այս գործով փաստաբանների լռությունը այն ֆոնին, երբ ԱԱԾ-ն մամուլով ապահովում է լիարժեք ինֆորմացիայի արտահոսք։
