Աֆրիկյան գեյերը Հռոմի պապ Ֆրանցիսկոսի այցին ընդառաջ՝ նրան են դիմել հովանավորության խնդրանքով: Այս մասին հայտնում է Reuters-ը:
Ուգանդայի գեյ-ակտիվիստները հայտարարել են, որ իրենք հուսով են՝ Ֆրանցիսկոսը «գոնե մարդկանց կբացատրի, որ ոչ ավանդական կողմնորոշումն անեծք չէ»: Ըստ «Ուգանդայի սեքսուալ փոքրամասնությունները» ոչ կառավարական կազմակերպության տնօրեն Ֆրենք Մուգիշիի՝ «եթե Պապը քարոզի գեյերի իրավունքների մասին, ուգանդացիները չեն լսի, բայց եթե նա խոսի իրավունքների, հանդուրժողականության և հավասարության մասին, Ուգանդան կլսի նրան»: Ուգանդայի կառավարության մամլո քարտուղար Շաբան Բանտարիզայի խոսքով՝ երկրի իշխանությունները «հուսով են, որ Պապի խոսքերը չեն հակասի ուգանդացիների արմատական համոզմունքներին»:
Ֆրանցիսկոս պապի այցը կսկսվի նոյեմբերի 25-ին: Պապը ծրագրում է այցելել Քենիա, Ուգանդա և Կենտրոնաաֆրիկյան Հանրապետություն: Թե ինչի մասին է նա մտադիր խոսել քարոզներում՝ առայժմ հայտնի չէ: Համարվում է, որ Ֆրանցիսկոսը սեքսուալ փոքրամասնություններին ավելի հանդուրժողաբար է վերաբերվում, քան նրա նախորդները, թեև Պապը բազմիցս հաստատել է, որ կաթոլիկ եկեղեցին մտադիր չէ փոխել վերաբերմունքը համասեռամոլության նկատմամբ. Վատիկանի տեսանկյունից՝ ոչ ավանդական կողմնորոշման փաստն ինքնին մեղք չէ՝ ի տարբերություն հոմոսեքսուալ սեռական ակտերի:
