Թուրքական T24 առցանց թերթի փոխանցմամբ՝ Թուրքիայի արտգործնախարար Ֆերիդուն Սինիրլիօղլուն հայտարարել է, որ Սիրիայի քրդերի «Դեմոկրատական միություն» կուսակցությունը (PYD) զինված կազմակերպություն չէ, այն քրդամետ «Ժողովուրդների դեմոկրատական» կուսակցության (HDP) նման քաղաքական կուսակցություն է։
Սինիրլիօղլուն այդ մասին հայտարարել է Hürriyet թերթի հետ զրույցում. «Անհրաժեշտ է միմյանցից տարանջատել PYD-ն ու YPG-ը (PYD-ի ռազմական թև, Սիրիայի քրդերի Ժողովրդական ինքնապաշտպանական ուժեր)։ YPG-ը հավասարազոր է PKK-ին («Քրդստանի աշխատավորական» կուսակցությանը)։ PKK-ն ներառված է մեր և ԱՄՆ-ի ահաբեկչական կազմակերպությունների ցուցակում։ Մինչդեռ PYD-ը կուսակցություն է, որը նման է մեր HDP-ին։ YPG-ը նրա ռազմական թևն է։ PYD-ի ձեռքում զենք չկա»։
Լրատվամիջոցն ընդգծում է, որ ավելի վաղ Թուրքիայի նախագահ Ռեջեփ Էրդողանը հայտարարել է, որ PYD-ը PKK-ի նման ահաբեկչական կազմակերպություն է, ԴԱԻՇ-ն էլ PKK-ի նման ահաբեկչական կազմակերպություն է։
Սինիրլիօղլուն հայտարարել է, որ անհնար է, որ PYD-ը ներկայացուցչություն բացի Ռուսաստանում։ Նա ընդգծել է, որ Սիրիայում Ռուսաստանի գործողությունների 90 տոկոսն ուղղված է Սիրիայի նախագահ Բաշար Ասադի վարչակարգի պաշտպանությանը, և միայն 5 տոկոսն է ուղղված ԴԱԻՇ-ի դեմ։
