Iribnews-ի փոխանցմամբ՝ Իրանի ու Ադրբեջանի միջև առևտրային կապերի զարգացման և մաքսային գործունեության բարելավման նպատակով պլանավորված է կամուրջ կառուցել Ասլանդյուզ-Հորդադիզ մաքսային անցակետում։ Այդ մասին հայտարարել է Իրանի խորհրդարանի տնտեսական հանձնաժողովի նախագահ Արսալան Ֆաթհիպուրը:
«Մենք շահագրգռված ենք Ադրբեջանի հետ կապերի հետագա զարգացմամբ և հատկապես առևտրի ոլորտում։ Դրա համար էլ ցանկանում ենք կամուրջ կառուցել Գուլիբեյլի գյուղում»,- ասել է Ֆաթհիպուրը՝ հավելելով, որ իրենք արդեն իսկ հետազոտություն են անցկացրել տեղանքում և ընտրել են կամրջի կառուցման վայրը:
«Հուսով ենք, որ դրա կառուցումը կսկսվի մոտ ժամանակներս։ Երկու երկրները շահագրգռված են այդ նախագծում»,- ասել է նա։
Ադրբեջանում Իրանի դեսպան Մոհսեն Փակայինը հայտարարել է, որ Արաքս գետի վրա կառուցվելիք կամուրջը կկրճատի Իրանից Գանձակ, ինչպես նաև Վրաստան տանող ճանապարհը։ Նոր կամուրջը նախատեսված կլինի մարդատար ու բեռնատար ավտոմեքենաների շարժի համար։
