Մարդու իրավունքների պաշտպան Կարեն Անդրեասյանը, այսօր հրավիրված ասուլիսի ընթացքում ամփոփելով իր պաշտոնավարման 50 օրը, անդրադարձավ երեկվա իր կոչին, որը վերաբերում էր ընդդիմության և իշխանության միջև որպես միջնորդ հանդես գալուն: Անդրեասյանը նշեց, որ ցանկացած երկխոսություն դրական է, սակայն դրանց արդյունքները ցայտուն չեն:
Հարցին, թե հնարավո՞ր է՝ այդ երկխոսությունը լինի արտահերթ նախագահական ընտրությունների վերաբերյալ,Անդրեասյանը պատասխանեց. «Երբ կողմերը նստում են բանակցային սեղանի շուրջ, քննարկվում են ցանկացած հնարավորություններ:Ես չեմ կարող կանխատեսել կամ գուշակել, թե ինչպիսին կլինեն կողմերի դիրքորոշումները, խնդիրները, օրակարգը, բայց մեկ կոնկրետ խնդիր դնելը կարողանալն ու դրա շուրջ կոնսենսուսի գալը կլինի մեր հաղթանակը»: Անդրեասյանի գնահատմամբ, եթե կողմերը նստեն երկխոսության սեղանի շուրջ, կձևավորեն օրակարգը՝ ընդունելով իրենց հայրենակցին որպես միջնորդ, այլ ոչ թե որպես անձ, որպես ինստիտուտ՝ սահմանադրությամբ նման խնդիրներ լուծելու համար:
Անդրեասյանը նկատեց, որ 2008 թվականի Մարտի 1-ից հետո մարդու իրավունքների պաշտպանը իրավական իմաստով հայտնվել է փակուղում. «Եթե այդ դեպքերի հետևանքով խախտված իրավունքների վերականգնման իրավական մեխանիզմները սպառված են, կարող ենք դիմել այլ միջոցների, որոնցից լավագույնն է՝ օգտվել քաղաքական երկխոսության ռեսուրսից»: Պաշտպանն ասաց, որ իր՝ քաղաքական երկխոսության միջնորդ լինելը արգելված չէ օրենքով: Ավելին, մարդու իրավունքների օրենքի երկրորդ հոդվածը հենց այդ դեպքերին է վերաբերում։ «Թե որքանով իրականանալի կլինի դա՝ հարցի քաղաքական կողմն է, բայց ես փորձ անելու իրավունք ունեմ, և կարծում եմ՝ կարող ենք դրական արդյունք ունենալ»,- ասաց Կարեն Անդրեասյանը:
