Ռուսական TASS լրատվական գործակալության փոխանցմամբ՝ Ադրբեջանում ընդդիմադիր «Մուսավաթ» կուսակցության թեկնածուների անունները, որը մի քանի օր առաջ հրաժարվեց Ադրբեջանի խորհրդարանական ընտրություններին մասնակցելուց, մնալու են քվեաթերթիկներում։ Այդ մասին մամուլի ասուլիսի ժամանակ հայտարարել է Ադրբեջանի ԿԸՀ նախագահ Մազախիր Պանախովը։
Նրա խոսքերով՝ օրենքն արգելում է ընտրություններից առաջ առնվազն 10 օրում որևէ փոփոխություն կատարել քվեաթերթիկներում. «Եթե մարդիկ ընտրեն նրանց, ապա ԿԸՀ-ն կճանաչի այն։ Նրանք ինքները պետք է որոշեն հրաժարվել պատգամավորական մանդատից, թե ոչ»։
Պանախովը կարծիք է հայտնել, որ «Մուսավաթ» կուսակցության ղեկավարությունը չէր կարող չիմանալ օրենքի տվյալ պահանջի մասին, որն ասում է, որ քաղաքական կուսակցությունը կարող է իր թեկնածուներին հետ կանչել քվեարկության օրվանից առնվազն 10 օրից ոչ ուշ ժամկետում։
«Մուսավաթ» կուսակցությունն առաջադրել է 25 թեկնածու, սակայն հոկտեմբերի 28-ին հրաժարվել է խորհրդարանական ընտրություններին մասնակցելուց՝ իր որոշումը պայմանավորելով երկրում ժողովրդավարական պայմանների բացակայությամբ։
