Բրիտանական The Independent թերթի փոխանցմամբ՝ Իրանի կառավարությունը դերասանուհի Սադաֆ Թահերիանին արգելել է աշխատել երկրում, ինչը տեղի է ունեցել այն բանից հետո, երբ նա Instagram-ի իր էջում լուսանկար է հրապարակել առանց հիջաբի (գլխաշոր)։ Մինչև վերջերս Թահերիանը սոցցանցերում իր էջերում լուսանկարներ էր հրապարակում հիջաբով, ինչը համապատասխանել է իրանական օրենքներին։
Սակայն նախորդ շաբաթ նա լուսանկար է տեղադրել առանց հիջաբի՝ որպես բողոքի նշան։ Tablet շոուին տված հարցազրույցի ժամանակ նա հայտարարել է, որ դեմ է արտահայտվում հարկադրաբար հիջաբ կրելուն և Իրանի կառավարության մյուս բռնի միջոցներին։
Իրանական կառավարամետ ԶԼՄ-ները զգուշացնում են, որ հիջաբ չկրող կանայք կարող են արժանանալ չափազանց մեծ ուշադրության և անգամ տղամարդկանց հարձակումներին, սակայն դերասանուհին պնդել է, որ նման խնդիրների բախվել է նաև հիջաբ կրելիս։
Իրանի մշակույթի նախարարությունը կարծում է, որ Թահերիանը հիջաբ կրելուց հրաժարվում է արևմտյան ԶԼՄ-ների ազդեցության պատճառով։ Նա Թահերիանի պահվածքը որակել է որպես «անբարո» և պահանջել է նրան զրկել աշխատանքային լիզենցիայից։ Հաղորդվում է նաև, որ Թահերիանը առանց հիջաբի լուսանկար հրապարակելուց հետո ստացել է բազմաթիվ վիրավորանքներ։ Չնայած դրան՝ Թահերիանն ընդգծել է, որ չի փոշմանել իր քայլից։
