Ադրբեջանական Turan լրատվական գործակալության փոխանցմամբ՝ ԱՄՆ Կոնգրեսի Հելսինկյան հանձնաժողովը, որը 57 երկրներում հետևում է մարդու իրավունքների պահպանմանն ու միջազգային համագործակցությանը, նոյեմբերի 5-ին հատուկ լսումներ է անցկացնելու Ադրբեջանում մարդու իրավունքները խախտելու մասին։
Միջոցառումը ստացել է «Ադրբեջանում օրենքի գերակայությունն ու քաղաքացիական հասարակություն» անվանումը, որը կենտրոնանալու է նրա վրա, Ադրբեջանի կառավարությունն օգտագործում է իր իրավական համակարգը` կառավարության քննադատներին հետապնդելու, հալածելու և կալանավորելու համար։
Բացի դրանից՝ նախնական վերլուծության են ենթարկվելու նոյեմբերի 1-ի խորհրդարանական ընտրությունները, թե ինչ ազդեցություն կունենա այն երկրի ապագայի վրա։ Հանձնաժողովի տարածած հայտարարությունում նշված է. «Վերջին երկու տարին վկայում է Ադրբեջանում մարդու իրավունքների և գերակայության հանդեպ մշտական խախտումների մասին։ Բազմաթիվ անկախ քաղաքացիական կազմակերպություններ հարկադրված են եղել փակվել՝ իրենց առաջնորդների ճնշումների, սպառնալիքների կամ կալանավորումների պատճառով։
Անկախ ԶԼՄ-ները լրջորեն սահմանափակել են իրենց գործունեությունը կամ փակվել են։ Ընդդիմադիր կուսակցությունները ենթարկվում են հալածանքների և հաճախ բացառվում են ընտրական գործընթացից։ Հայտնի քաղաքական գործիչները քաղաքական դրդապատճառներով դատապարտվում են տևական ժամկետներով ազատազրկումների»։
Քննարկումներին մասնակցելու է նաև Ադրբեջանում ԱՄՆ նախկին դեսպան Ռիչարդ Մորնինգսթարը։ Հիշեցնենք, որ սրանից առաջ էլ ԱՄՆ Սենատում էին լսումներ կազմակերպվել Ադրբեջանում մարդու իրավունքների կոպիտ ոտնահարումների համար։
