Իսրայելն ակնկալում է 2016թ. սկզբին պաշտոնական բանակցություններ սկսել և մոտ 2 տարվա ընթացքում հասնել Եվրասիական տնտեսական միության (ԵՏՄ) հետ ազատ առևտրի գոտու ստեղծման վերաբերյալ համաձայնագրի: RIA Novosti-ի հաղորդմամբ՝ այս մասին հայտնել է ռուս-իսրայելական միջկառավարական հանձնաժողովի համանախագահ, Իսրայելի կառավարության անդամ Զեեև Էլկինը:
Իսրայելի հետ բանակցային գործընթաց սկսելու որոշումը ԵՏՄ անդամ պետությունների ղեկավարները հաստատել են հոկտեմբերի 16-ին՝ Ղազախստանի Բուրաբայ բնակավայրում կայացած գագաթնաժողովում:
«Մենք ռուսական կողմին առաջարկում ենք արդեն 2016թ. սկզբին բանակցություններ սկսել և առնվազն 2 շրջան բանակցություններ վարել 2016թ.: Դժվար է նախօրոք կանխատեսել համաձայնագրի ձեռք բերման ստույգ ժամկետը: Դա կախված է նրանից՝ քանի բարդ հարց կլինի: Որպես կանոն, եթե նորմալ տեմպով աշխատենք, երկու տարում կամ դրանից փոքր-ինչ ավելի ժամանակում կարելի է հասնել այդպիսի համաձայնագրի ստորագրման»,- ասել է Էլկինը ռուսական ԶԼՄ-ներին:
«Մենք մեր կողմից ամեն ինչ կանենք, որպեսզի դա հնարավորինս շուտ լինի: Մենք կարծում ենք, որ դա մեծ պոտենցիալ ունի և՛ իսրայելական տնտեսության համար, և՛ ԵՏՄ երկրների: Կարծում եմ, որ դա ձգձգելու ոչ մի պատճառ չկա»,- հավելել է նա:
