Նախագահական արտահերթ ընտրություններ անցկացնելու Սիրիայի նախագահ Բաշար Ասադի պատրաստակամությունն ակնհայտորեն ռուսական ծագում ունի: Ասադն այս մասին ասել է Դամասկոսում ռուս խորհրդարանականների պատվիրակությանը Մոսկվա իր այցից և Ռուսաստանի նախագահ Վլադիմիր Պուտինի հետ հանդիպումից 3 օր հետո: Այն մասին, որ Կրեմլը պնդում է այդպիսի սցենարի հարցում, գրում է նաև Bloomberg-ը՝ հղում անելով մոսկվայում անանուն բարձրաստիճան պաշտոնյայի:
«Արտահերթ ընտրություններն ինքնին Ռուսաստանում վերանշանակման (նախևառաջ կառավարչի) վաղուց փորձված մեթոդ է: Ասադի դեպքում հնարավոր է երկու գրեթե հակադիր տարբերակ: Առաջինը գործող նախագահի «մանդատի թարմացումն է, որի լեգիտիմ իշխանությունը Մոսկվան պաշտպանում է առանց արևմտյան գործընկերների հասկացվածության: Ճիշտ է, քաղաքացիական պատերազմից տառապող երկրում արտահերթ ընտրություններ անցկացնելը և դրանց հաղթողին լեգիտիմ նախագահ հայտարարելը տեսականորեն հնարավոր է, բայց գործողության արժեքը զրոյական կլինի:
Քիչ թե շատ լեգիտիմ ընտրություններ հնարավոր են միայն զինադադարից հետո, իսկ զինադադարը՝ ԴԱԻՇ-ի տապալումից կամ գրոհայիններից տարածքի մեծ մասից մաքրելուց հետո: Պարզ է, որ ԴԱԻՇ-ի նկատմամբ հաղթանակը նույնիսկ ռուսական օդուժի և իրանական ուժերի աջակցությամբ ոչ մոտ ապագայի գործ է: Ռուսաստանի կողմից ընտրություններին Ասադի մասնակցությունն ընդունելը կնշանակի, որ Մոսկվան հրաժարվում է անցումային կառավարություն ստեղծելու վերաբերյալ նախկին պայմանավորվածություններից և նախկինի պես խաղադրույք է անում պետության ներկայիս ղեկավարի վրա՝ չցանկանալով հրաժարվել Մերձավոր Արևելքում իր «մարդուց»»,- նշում է Ալեքսեյ Մալաշենկոն Քարնեգիի կենտրոնից, գրում է vedomosti.ru-ն: Եթե դա տեղի ունենա, սիրիական ընդդիմությունը և նրանից հետո՝ Արևմուտքը, Թուրքիան և արաբական երկրները, չեն ճանաչի ընտրությունները, պատերազմի շարունակությունն անխուսափելի կլինի:
Ինչ-որ կերպ Դամասկոսին և նրա չափավոր ընդդիմադիրներին հաշտեցնելու Կրեմլի փորձերն անբավարար և հակասական են: Չափավոր ընդդիմության շատ անդամներ պատրաստ չեն համագործակցել Ռուսաստանի և Ասադի հետ, Կահիրեում բանակցելու Սիրիական ազատ բանակի առաջարկին ռուսական իշխանություններն առայժմ չեն պատասխանել:
Մյուս կողմից՝ արտահերթ ընտրությունները կարող են Ասադի փափուկ հեռացման սցենարի մաս լինել. այդ դեպքում Սիրիայի ներկայիս նախագահը վերջին պահին կհրաժարվի ընտրություններին մասնակցել և ուրիշ թեկնածուի կառաջադրի՝ չափավոր ընդդիմության համար ընդունելի, նշում է միջազգային հարաբերությունների հարցերով փորձագետ Վլադիմիր Ֆրոլովը: Այդ դեպքում Մոսկվան այլ դժվարությունների կբախվի. նա ուշացել է չափավոր ընդդիմության հետ կապեր հաստատելու հարցում: Նրա համար դժվար կլինի ապահովել ալավիների փոքրամասնության անվտանգությունը: Պարզ չէ նաև՝ ինչ անել Ասադի ամենամոտ շրջապատի հետ, որին նրա հակառակորդները մեղադրում են ռազմական հանցագործությունների և խաղաղ բնակչության ոչնչացման համար:
Մոսկվայի նախորդ խնամարկյալը նման (և նույնիսկ շատ ավելի խաղաղ) իրավիճակում նույնպես հայտարարեց արտահերթ նախագահական և խորհրդարանական ընտրություններին համաձայնության մասին: 2014 թ. փետրվարի 4-ին Վիկտոր Յանուկովիչն ընտրություններ խոստացավ, փետրվարի 21-ին ընդդիմության հետ համաձայնագիր ստորագրեց, իսկ հաջորդ օրը փախավ Կիևից և հեռացվեց իշխանությունից Գերագույն ռադայի որոշմամբ, ասվում է հոդվածում:
