ՍԴ միջազգային պայմանագրերի բաժնի վարիչ Վլադիմիր Վարդանյանը կարծում է, որ Ստեփանակերտի օդանավակայանը կարող է իրականացնել չվերթներ միայն դեպի Երևան:
Այսօր Ամերիկյան համալսարանում տեղի ունեցած քննարկման ժամանակ պարոն Վարդանյանը նշեց. «Չվերթները Երևան-Ստեփանակերտ և Ստեփանակերտ-Երևան, կարծես թե, որևէ տեսակետից որևէ խնդիր չեն հարուցում, եթե, իհարկե, ապահովված է չվերթի անվտանգությունը: Ինչ վերաբերում է միջազգային չվերթներին, ապա այստեղ ես խնդիրներ տեսնում եմ»,- ասաց պարոն Վարդանյանը:
Վերջինս կարծում է, որ օդանավակայանի գործարկումից հետո, երբ տեղի ունենա առաջին չվերթը, Ադրբեջանը կբողոքի Քաղավիացիայի միջազգային կազմակերպություն` ՀՀ դեմ վարույթ իրականացնելու պահանջով: Նա որպես օրինակ բերեց փաստը, որ Վրաստանը նման բողոք հղել է Սուխումիի օդանավակայանի գործարկման կապակցությամբ, և ՔՄԿ-ում վարույթ է հարուցված: Վարդանյանը նաև նշեց, թե չճանաչված պետության կողմից օդանավակայանի գործարկման պրակտիկա չկա:
Ինչ վերաբերում է Ադրբեջանի սպառնալիքներին, թե կոչնչացնի քաղաքացիական օդանավերը, Վլադիմիր Վարդանյանն ասաց, թե դա կդիտվի որպես ռազմական հանցագործություն: Ըստ նրա` ՄԱԿ-ի կանոնադրությունը ևս արգելում է քաղաքացիական ավիացիայի ոչնչացումը կամ վնասելը:
