Իշխանությունը Րաֆֆի Հովհաննիսյանից և նրա շարժումից որևիցե վտանգ չի զգում: Այս մասին այսօր «Առաջին լրատվական»-ի հետ զրույցում ասաց քաղաքական և ընտրական տեխնոլոգիաների փորձագետ Արմեն Բադալյանը՝ անդրադառնալով ներքաղաքական զարգացումներին և հարցին՝ ինչո՞ւ իշխանությունը գործի չի դնում ընդդիմության հանրահավաքները ճնշելու իր մեխանիզմները:
Նա նշեց, որ կարևոր է հիշել 2008թ.-ի նախագահական ընտրություններից մինչև մարտի 1-ն ընկած ժամանակահատվածը, երբ հենց Ազատության հրապարակում երաժշտության հնչյուններ էին լսվում, ոստիկաններն անմիջապես արձագանքում էին՝ արգելելով երաժշտություն միացնել, իսկ 2013թ. փետրվարի 18-ից հետո «Ժառանգություն» կուսակցության առաջնորդ Րաֆֆի Հովհաննիսյանը մի շարք հանրահավաքներ կազմակերպեց, իսկ շաբաթ օրերին՝ երաժշտության երեկոներ, որոնք ոստիկանության կողմից չարգելվեցին:
Նա հիշեցրեց, որ չի արգելվել նաև վաղվա երթը, պարզապես որոշակի փոփոխություն է մտցվել: Ըստ Արմեն Բադալյանի՝ դա վկայում է այն մասին, որ իշխանությունը հասկանում է՝ Րաֆֆի Հովհաննիսյանից և նրա շարժումից որևիցե վտանգ չկա, և եթե վտանգ չկա, անիմաստ է արգելելը:
«Ընդհանրապես չեն էլ վախենում: Իշխանություններին կարող ենք քննադատել ավտորիտար կառավարման համակարգի մեջ, կարող ենք քննադատել, որ նրանք պետական բյուջեն են վատնում, դատաիրավական համակարգը չեն բարեփոխում, բայց մենք չենք կարող ասել, որ նրանք հիմար են:
Իշխանությունները շատ լավ հասկանում են, որ Րաֆֆի Հովհաննիսյանի գլխավորած գործընթացը որևէ հեռանկար չունի: Ուստի նրան շատ հանգիստ թույլ են տալիս հանրահավաքներ անցկացնել, երբ ցանկանում է: Ինչո՞ւ ճնշումներ բանեցնել և դրսի ուժերին առիթ տալ մեղադրելու իշխանություններին հակաժողովրդական քայլերի մեջ»,- մեկնաբանեց Արմեն Բադալյանը:
Հարցին՝ ապրիլի 9-ին կլինի սկի՞զբ, թե՞ վերջ, քաղաքական փորձագետը պատասխանեց, որ պետք է հասկանալ՝ վաղն ընդամենը «Ժառանգություն» կուսակցության հանրահավաքն է, ուրիշ ոչինչ, իսկ ապրիլի 10-ին ՀՀ-ն կունենա մեկ հաստիքային և մեկ արտահաստիքային նախագահ:
