Sputnik գործակալության փոխանցմամբ՝ ավելի քան 60 ազդեցիկ քաղաքական գործիչներ ու միջազգային կազմակերպությունների անդամներ վաղը կհավաքվեն Թեհրանում, որպեսզի մասնակցեն Մյունխենի անվտանգության կոնֆերանսի արտագնա նիստին։ Այդ մասին հայտնել է Իրանի ԱԳՆ-ի՝ հասարակայնության հետ կապերի վարչությունը։
Վերջինիս հաղորդմամբ՝ կոնֆերանսի մասնակիցների թվում լինելու են Իրանի արտգործնախարար Մոհամմադ Ջավադ Զարիֆը, Գերմանիայի արտգործնախարար Ֆրանկ Վալտեր Շտայնմայերը, Աֆղանստանի ղեկավար Սալահուդդին Ռաբանին, Իրաքի արտգործնախարար Իբրահիմ ալ-Ջաֆարին, Լիբանանի արտգործնախարար Ջեբրան Բասիլը, ՄԱԿ-ի՝ Սիրիայի հարցերով հատուկ ներկայացուցիչ Ռամզի Էզեդդին Ռամզին, ԵՄ-ի արտաքին քաղաքական ծառայության գլխավոր քարտուղարի տեղակալ Հելգա Շմիդը և այլք։
Իրանի ԱԳՆ-ը հայտնել է, որ կոնֆերանսի մասնակիցները պատրաստվում են քննարկել մերձավորարևելյան տարածաշրջանի անվտանգության ոլորտում ստեղծված իրավիճակը, այժմեական խնդիրներն ու ճգնաժամերը և հատկապես Սիրիայի ճգնաժամը։
Բացի այդ, նրանք քննարկելու են ահաբեկչության և հատկապես ԴԱԻՇ-ի դեմ պայքարի հարցը, ինչպես նաև Մերձավոր Արևելքի երկրներից Եվրոպա փախստականների հոսքի հարցը։
