Ապրիլի 7-ից մեկնարկած Գյումրի-Երևան քայլերթի մասնակիցներն իրենց ճանապարհի կեսն արդեն անցել են: ԳԱԼԱ-ի հետ զրույցում քայլերթի մասնակիցներից Համլետ Գրիգորյանը նշել է. «Գիշերել ենք Գյումրի-Երևան ճանապարհին՝ Կաթնաղբյուրի խաչմերուկում գտնվող գազալցակայանի հարակից տարածքում: Ոմանք քնել են վրանում, ոմանք մեքենայում, մյուսներն էլ` դրսում»:
Իսկ արդեն ապրիլի 8-ին առավոտյան ժամը վեցից շարունակել են իրենց ճանապարհը, ընդմիջել և նախաճաշել են արդեն Ուջանում` իրենց ուղեկցող ոստիկանների հետ միասին.«Ճանապարհի ընթացքում ոստիկանները միշտ մեր հետևից գալիս էին մեքենայով, ամբողջ գիշեր մեր կողքին են եղել, նույնիսկ մեր հաց ուտելու ժամանակ նրանց հյուրասիրել ենք մեր հացից, սուրճից, սկզբից մերժեցին, հետո հյուրասիրվեցին»,-պատմել է զրուցակիցը:
Նշենք, որ չնայած երկարատև ոտքով ճանապարհի բոլոր դժվարություններին, մասնակիցներից որևէ մեկի մոտ առողջական խնդիրներ չի գրանցվել.«Հենց մասնակիցներից որևէ մեկը հոգնում է, ոտքն է ցավում կամ վատ է զգում, բոլորով կանգնում ենք, օգնություն ենք ցույց տալիս, սպասում մինչև լավ կզգա և շարունակում ենք ճանապարհը»,-նշել է Համլետ Գրիգորյանը: Ճանապարհին մասնակիցներին միացողներ էլ են եղել, եղել են նաև խմբից հեռացողներ՝ հետագայում կրկին քայլերթին միանալու պայմանով:
Հիշեցնենք, որ մասնակիցները նախատեսում են, որ ապրիլի 9-ին լինելու են Երևանի Ազատության հրապարակում` հանրահավաքին և Րաֆֆի Հովհաննիսյանի երդմնակալության արարողությանը մասնակցելու համար: Ինչպես նշել են, նախօրոք մշակված ժամանակացույցից նույնիսկ մի փոքր առաջ են, և եթե իրենց ոչինչ չխանգարի, ապրիլի 9-ին կլինեն Ազատության հրապարակում :
