Հայաստան է ժամանել Իրանի փոխնախագահ Էսհախ Ջահանգիրին: Գնահատելով այս այցը և անդրադառնալով հայ-իրանական հեռանկարային հարաբերություններին՝ իրանագետ Ռուդիկ Յարալյանը «Առաջին լրատվական»-ի հետ զրույցում նշեց. «Այս այցի օրակարգի հիմքում տնտեսական համագործակցությունն է: Այսօր արդեն սայլը տեղից շարժվում է, ինչի վկայությունն է այս այցը: Հայ-իրանական հարաբերությունների զարգացումն անհրաժեշտ է ոչ միայն երկու երկրների հասարակություններին, այլև իշխանություններին»:
Դիտարկմանը՝ որքանո՞վ Մոսկվան թույլ կտա զարգացնել Իրան-Հայաստան հարաբերությունները, իրանագետը շեշտեց. «Մենք պետք է օգտագործենք այն ուղղությունները, որը միավորում է այս երկու պետություններին»:
«Քանի դեռ կա Թուրքիա-Ադրբեջան տանդեմը, Հայաստանը Իրանի համար միշտ հետաքրքրություն է ներկայացնելու: Իսկ այն երկրները, որոնք պատրաստ չեն լինի ընկալելու Իրանի նոր դերը տարածաշրջանային զարգացումներում, միանշանակ կորցնելու են»,- ընդգծեց մեր զրուցակիցը:
Մեր հարցին՝ Իրան-Արևմուտք հարաբերությունների ջերմացումից հետո կարո՞ղ է արդյոք Իրանը դերակատարություն ունենալ ԼՂ հարցում՝ որպես այլընտրանք Թուրքիային, Ռուդիկ Յարալյանը ասաց. «Եթե ապագայում ձևավորվի մեզ համար անցանկալի ձևաչափ, այսինքն՝ դրանում ընդգրկվի Թուրքիան, մենք պե՛տք է այդ ձևաչափի մեջ ներգրավենք Իրանին՝ որպես Թուրքիային հակակշռող ուժ տարածաշրջանում»:
